Toshkent shahrida ko‘cha-yo‘l tarmog‘ining texnik holatini yaxshilash, harakat xavfsizligi hamda transport o‘tkazuvchanligini oshirishga qaratilgan ishlar rejali asosda davom etmoqda. Jumladan, poytaxtning qator markaziy ko‘chalarida asfaltlash, frezalash va infratuzilmani yangilash ishlari amalga oshirilmoqda.

Xususan, Shahar markaziy ko‘chalaridan foydalanish, ularni saqlash va ta’mirlash ixtisoslashtirilgan boshqarmasi tomonidan Buyuk ipak yo‘li hamda Farg‘ona yo‘li ko‘chalarida frezalash va asfaltlash ishlari olib borildi.

Shuningdek, Buyuk ipak yo‘li ko‘chasi bo‘ylab 3 ta chorrahada «aqlli» svetoforlarni o‘rnatish uchun yer qazish, asfalt kesish va kabel o‘tkazish ishlari boshlandi.

Bundan tashqari, Buyuk ipak yo‘li ko‘chasida joylashgan «Salom choyxonasi» avtobus bekatini yangilash maqsadida uning poydevor qismi ta’mirlandi.

Sebzor ko‘chasida ham asfaltlash ishlari davom ettirilib, ko‘chaning Abdulla Qodiriy va Nurafshon ko‘chalari kesishmalari oralig‘idagi qismida reja asosida frezalash hamda asfaltlash ishlari yakunlandi.

Source link

«Turmush qurganimga 20 yil bo‘ldi. Hozirgacha umr yo‘ldoshim odamlar oldida meni haqoratlaydi va so‘kib gapiraveradi. Shuncha yil chidadim, lekin so‘nggi paytlarda kundan-kunga undan ko‘nglim sovib boryapti. Nima qilay?». 

Hurmat bilan Yu.

Bu holat 20 yildan beri eriga ham, xotiniga ham odatga aylanib ulgurgan. Ayol ajrashib ketolmaydi, ranjib yashashi esa me’yordagi hayot tarzidek bo‘lib qolgan. Boshi berk ko‘chaga kirib qolgandan keyin, ayol o‘zining o‘rniga kimdir qaror qabul qilishini istayapti, tashqaridan uning uchun javob topib berish kerakdek go‘yo. «Birga yashayver, chida» yoki «bunday er bilan yashama, chiqib ket» degan maslahatni kutyapti. Ya’ni, har qanday holatda ham o‘zi aybdor bo‘lmasligi kerak. Ammo, bilib qo‘ysinki, qanchalik ko‘p ranjib, bu hissiyotni ko‘tarib yursa, janjal yoki haqoratlar shu qadar ko‘payib ketaveradi.

Aslida hayotdan nolib, arz qilgan odamni xafa qilaveradilar. Nafaqat eri, balki boshqalardan ham salbiy munosabat kutish mumkin. O‘zini qadrlamagan, sevmagan odamni hammaning oldida haqorat qilaveradilar. Bu ayol shu paytgacha barchaning ko‘zi oldida o‘zini ranjitishga qo‘yib beryapti, endi bu yog‘iga kurashadigan bo‘lsa, janjal ko‘payadi.

Maslahatlar:

1. Erining harakatlari odatiy hol ekanligiga e’tibor bermasdan (zero, 20 yil fe’l-atvorlarni o‘rganish uchun yetarli muddat), shaxsiy fikri bilan yashasin. Kim haq, kim nohaqligini odamlarning o‘zlari ajratib olishadi.

2. Bu ayol odamlar oldida hurmatim yo‘qolyapti, deb izza bo‘lishdan qo‘rqyapti. Shunday ekan, o‘zini qadrlashni o‘rgansin, yaxshi ko‘rgan ishlari bilan shug‘ullansin. Kerakli yo‘lni tanlasin, kimgadir qarab yashamasin, shaxsiy fikrini boyitsin.

3. Har kuni kamida yarim soat hadislar, hikmatlar, badiiy kitoblar, gazetalar o‘qib, ma’naviyatini oshirsin (bu tadbir takror aytilayotgan bo‘lsa-da, nihoyatda zarur).

4. Xobbi, sevimli mashg‘uloti bilan shug‘ullansin. Barmoq uchlarida tinchlantiruvchi sezgi a’zolarimiz mavjud, shu sababli kashta tikib yoki mayda rasm chizib, biror narsani tayyorlab ko‘rsin.

5. Shaharda yashasa, sport majmuasiga qatnasin, kayfiyatini ko‘taradigan raqs to‘garagiga borsin. Xullas, aniq maqsad sari o‘zini yo‘naltirsa, eri bilan kechayotgan mojarolardan uzoqlashadi.

«Go‘zal hayot tilsimi» kitobidan.

Source link

Yaqin Sharq mamlakatlariga turoperator va turagentlar xizmatlari orqali sayyohlik maqsadida borgan fuqarolarimiz noqulay vaziyatlarda qolib ketishini oldini olish maqsadida O‘zbekiston Respublikasi Turizm qo‘mitasi tomonidan maxsus Telegram bot @tourism_murojaat_bot ishga tushirildi. Bu haqda qo‘mita axborot xizmati xabar berdi.

Mazkur bot orqali mamlakatimiz fuqarolari o‘zlari haqida yoki ularning yaqin qarindoshlari tomonidan ma’lumotlarni kiritgan holda Turizm qo‘mitasini xabardor qilishlari mumkin. Mazkur ma’lumotlar asosida fuqarolarni birinchi navbatda O‘zbekiston Respublikasiga olib kelish choralari ko‘riladi.

Ushbu bot orqali murojaat qoldirishda fuqarolardan aniq va to‘liq ma’lumot taqdim etish so‘ralmoqda.

Source link

O‘zbekiston Respublikasi Prezidentining “Zulfiya nomidagi Davlat mukofoti bilan taqdirlash to‘g‘risida”gi qaroriga muvofiq, mamlakatimizning bir guruh faol va tashabbuskor xotin-qizlari nufuzli mukofot bilan taqdirlandi.

Ular orasida Qashqadaryo viloyati Koson tumanida yashovchi iqtidorli shoira Latofat Amirova ham bor.

Yosh ijodkorning iste’dodi va ijodiy yutuqlari yuksak e’tirof etilib, Prezident topshirig‘iga asosan unga Samarqand shahrining Qorasuv massividan ikki xonali, barcha sharoitlarga ega, mebellar bilan jihozlangan uy topshirildi.

Uy kalitini topshirish marosimida viloyat hokimi Adiz Boboyev ishtirok etdi. Tadbir davomida hokim yosh shoira Latofat Amirovani erishgan yutuqlari bilan samimiy qutlab, unga oilaviy xotirjamlik, mustahkam baxt va kelgusidagi ijodiy faoliyatida ulkan muvaffaqiyatlar tiladi.

Ta’kidlanishicha, Zulfiya nomidagi Davlat mukofoti yurtimizda iqtidorli, faol va tashabbuskor qizlarni qo‘llab-quvvatlash, ularning ilm-fan, adabiyot, madaniyat va san’at sohalaridagi yutuqlarini rag‘batlantirishda muhim ahamiyat kasb etadi.

Source link

Bugun kunduzi Qoraqalpog‘iston Respublikasida, ertalab Farg‘ona vodiysi viloyatlarida va kechga tomon Toshkent, Samarqand, Jizzax, Sirdaryo, Qashqadaryo viloyatlarida ba’zi joylarda yomg‘ir yog‘adi. Qolgan hududlarda yog‘ingarchilik kutilmaydi. Ba’zi joylarga tuman tushadi. Shamol 7-12 m/s tezlikda esadi. Harorat 10-15° iliq bo‘ladi.

Poytaxtimizda yog‘ingarchilik kutilmaydi, faqat kechqurun biroz yomg‘ir yog‘ishi mumkin. Ertalab tuman tushadi. Shamol 3-8 m/s tezlikda esadi. Harorat 11-13° iliq bo‘ladi.

Tog‘ oldi va tog‘li hududlarda vaqti-vaqti bilan yog‘ingarchilik (yomg‘ir, qor) bo‘ladi. Ba’zi joylarga tuman tushadi. Tog‘li hududlarda qor ko‘chishi xavfi bor. Sel-suv toshqin hodisalari yuzaga kelishi mumkin. Shamol 7-12 m/s tezlikda esadi. Harorat 3-8° iliq bo‘ladi.

Source link