Dunyodan
Urushda 325 ming rus va 140 ming ukraina askari halok bo’ldi.
Amerikaning yetakchi tahlil markazi bo‘lmish Strategik va xalqaro tadqiqotlar markazi (CSIS) Rossiya va Ukraina o‘rtasidagi urushda har ikki tomon ko‘rgan yo‘qotishlar haqida hisobot e’lon qildi.
CSIS hisob-kitoblariga ko‘ra, Rossiya armiyasi jami 1,2 million askarini yo‘qotgan, 2022-yil fevral oyida to‘liq miqyosli bosqin boshlanganidan beri ularning 325 mingga yaqini halok bo‘lgan.
Bu raqamlar ochiq manbalar asosida Rossiya harbiy yo‘qotishlarini hisoblaydigan bir qancha manbalar ma’lumotlariga yaqin. Ularning hisob-kitoblariga ko‘ra, Rossiya tomonidan o‘ldirilganlar soni 254,8 mingdan 368,1 ming kishigacha bo‘lishi mumkin. Ammo, agar bu raqamlar Donetsk va Lugansk armiyalarida Ukraina bilan janglarda halok bo’lganlarni o’z ichiga olgan bo’lsa, umumiy yo’qotishlar soni yanada oshadi.
CSIS hisobotida qayd etilishicha, qurbonlar sonini aniqlash qiyin. Buning sababi, jarohatlar haqida ommaviy axborot vositalarida xabar berilmagani va ko’plab yaralangan askarlar davolanishdan so’ng frontga qaytib, qayta jarohat olishgan.
CSIS hisobotida Rossiyaning yo’qotishlari haqida “Ikkinchi jahon urushidan beri hech bir yirik davlat bunday miqyosdagi yo’qotishlarga duch kelmagan”.
Ukraina tomonida esa Ukraina Qurolli Kuchlari urushda 500-600 ming askarini yo‘qotgan bo‘lishi mumkin, deyiladi tahlil markazi hisobotida. Taxminlarga ko’ra, 100 mingdan 140 minggacha odam halok bo’lgan.
Ayni paytda Kreml CSIS hisobotiga munosabat bildirdi va raqamlar shubhali ekanini aytdi. Rossiya prezidenti matbuot kotibi Dmitriy Peskov bu maʼlumotlarni ishonchli deb hisoblamaslik kerakligini aytdi.
“Bunday xabarlarni ishonchli ma’lumot sifatida qabul qilib bo’lmaydi. Yo’qotishlar haqida ma’lumot berish huquqi faqat Rossiya Mudofaa vazirligiga tegishli”, – dedi Peskov.
Ayni paytda Rossiya Mudofaa vazirligi urush paytidagi yo’qotishlar haqida rasmiy ma’lumotlarni e’lon qilmayapti.