Iqtisodiyot
Transport-logistika markazlariga qo‘yiladigan talablar tasdiqlandi
Vazirlar Mahkamasi qarori bilan transport-logistika markazlarining infratuzilmasi va jihozlanishiga qo‘yiladigan mezonlar va talablar tasdiqlandi.
TLM (transport-logistika markazlari) maxsus reyestrga kiritiladi va ular o‘z reytingiga ega bo‘ladi. Reytingdagi umumiy baho tadbirkorlarning barqarorlik reytingidagi ballar va TLM uchun tasdiqlangan ko‘rsatkichlar bo‘yicha qo‘shimcha ballar yig‘indisi asosida shakllantiriladi.
Vazirlar Mahkamasi qarori mintaqaviy va xalqaro TLM hududi, asbob-uskunalari, texnik ta’minoti, omborlar, konteynerlarni saqlash zonasi va quruq portlar, transport-logistika markazlari faoliyatining boshqa jihatlariga qo‘yiladigan namunaviy talablar paketini belgilaydi.
TLM aholi punktlari, alohida muhofaza etiladigan tabiiy hududlar yoki qishloq xo‘jaligi ekin maydonlaridan tashqarida joylashgan bo‘lishi kerak. Bunda ajratilgan yer uchastkalarida faoliyatning boshqa turlariga yo‘l qo‘yilmaydi.
Temiryo‘llardan, avtomobil yo‘llari uzellaridan, xalqaro yoki davlat ahamiyatiga ega bo‘lgan avtomobil yo‘llaridan transport vositalarining harakatlanishi uchun yetarli bo‘lgan yo‘l bo‘ylab TLMgacha bo‘lgan masofa 3 kmdan oshmasligi kerak.
TLM joylashgan joyiga qarab mamlakatlar yoki mintaqalar uchun taqsimlash va yig‘ish markazi vazifasini bajara olishi kerak.