Jamiyat
Toshkentda yashash qimmatlashyapti — Numbeo
Numbeo portali Toshkent shahrida o‘rtacha sharoitda yashash uchun zarur bo‘lgan pul mablag‘lari miqdorini ma’lum qildi.
Toshkent shahri bo‘yicha e’lon qilingan yangi hisob-kitoblar poytaxtda yashash xarajatlari yildan yilga oshib borayotganini ko‘rsatgan.
Ma’lumotlarga ko‘ra, to‘rt kishilik oilaning oylik o‘rtacha xarajati ijara to‘lovisiz 23,5 million so‘mdan oshadi. Yakka yashovchi shaxs uchun esa bu ko‘rsatkich 6,3 million so‘m atrofida baholangan.
Hisobotda oziq-ovqat, transport, ijara, kommunal xizmatlar va boshqa kundalik ehtiyojlar bo‘yicha o‘rtacha narxlar keltirilgan. Jumladan, Toshkentda arzon restoranda bir marta ovqatlanish 70 ming so‘m, ikki kishilik o‘rta toifadagi restoranda kechki ovqat esa o‘rtacha 400 ming so‘mga tushadi.
Bozor narxlarida ham sezilarli o‘sish kuzatilmoqda. Masalan:
1 kg go‘sht — qariyb 138 ming so‘m;
1 kg tovuq go‘shti — 48 ming so‘m;
12 dona tuxum — 22 ming so‘mdan ziyod;
1 litr sut — 14,7 ming so‘m atrofida.
Poytaxtda ijara bozori ham yuqori darajada qolmoqda. Shahar markazida bir xonali kvartira ijarasi o‘rtacha 7,4 million so‘m, markazdan tashqarida esa 4,4 million so‘m atrofida baholangan.
Shu bilan birga, hisobotda Toshkentdagi o‘rtacha oylik maosh soliqdan keyin 7,3 million so‘m ekani qayd etilgan. Bu esa ayrim holatlarda hatto bir xonali uy ijarasini qoplash uchun ham yetarli emas.
Mutaxassislar fikricha, aholi daromadlari va yashash xarajatlari o‘rtasidagi farqning kengayishi kelgusida ijtimoiy va iqtisodiy bosimni kuchaytirishi mumkin. Ayniqsa, uy-joy ijarasi, oziq-ovqat va ta’lim xarajatlarining yuqoriligi o‘rta daromadli oilalar uchun jiddiy yuk bo‘lib qolmoqda.