Jamiyat
Taniqli olim Azmiddin Sadriddinov vafot etdi
O‘zbekistonda xizmat ko‘rsatgan qishloq xo‘jaligi mexanizatori, mashinasozlik sohasidagi taniqli olim, Toshkent davlat texnika universiteti professori Azmiddin Sadriddinovich Sadriddinov 2025 yil 4 dekabr kuni 89 yoshida vafot etdi. Marhumning vafoti munosabati bilan davlat rahbariyati tomonidan hamdardlik bildirildi.
Foto: Prezident matbuot xizmati
Azmiddin Sadriddinov 1936 yil 26 iyunda Toshkent shahrida ziyoli oilada tug‘ilgan. U Toshkent yengil sanoat institutida muhandis-mexanik mutaxassisligi bo‘yicha ta’lim olgan, mehnat faoliyatini O‘rta Osiyo politexnika instituti (hozirgi Toshkent davlat texnika universiteti)da katta laborant sifatida boshlagan. Keyinchalik aspiranturada tahsil olib, nomzodlik va doktorlik dissertatsiyalarini himoya qilgan.
Iste’dodli olim uzoq yillar davomida Toshkent davlat texnika universitetida katta o‘qituvchi, dotsent, fakultet dekani, birinchi prorektor va professor lavozimlarida samarali faoliyat yuritdi. Shu bilan birga, Qishloq xo‘jaligi ilmiy-ishlab chiqarish markazining Toshkent viloyati bo‘limi rahbari sifatida agrar sohani zamonaviy mexanizatsiyalashtirishga doir ilmiy ishlanmalarni amaliyotga joriy etishga hissa qo‘shdi.
Sadriddinov 65 yildan ziyod ilmiy-pedagogik faoliyati davomida paxta terish mashinalarini takomillashtirish bo‘yicha muhim tadqiqotlar olib bordi, o‘nlab maqolalar, risolalar, monografiyalar va metodik qo‘llanmalar muallifi hisoblanadi. U rahbarlik qilgan 40 dan ziyod ilmiy loyihalar, davlat grantlari va shartnomaviy ishlar qishloq xo‘jaligi texnikasi va texnologiyalarini yangilashda muhim ahamiyat kasb etgan.
Olim ko‘plab shogirdlar tayyorladi, uning rahbarligida o‘nlab nomzodlik va beshta doktorlik dissertatsiyalari himoya qilindi. Azmiddin Sadriddinovning qishloq xo‘jaligi mashinasozligini rivojlantirish yo‘lidagi xizmatlari “O‘zbekistonda xizmat ko‘rsatgan qishloq xo‘jalik mexanizatori” faxriy unvoni, “Do‘stlik” va “Mehnat shuhrati” ordenlari bilan munosib taqdirlangan.