Siyosat
Shavkat Mirziyoyev Toshkentda Italiya Bosh vaziri Giorgia Meloni bilan uchrashdi
O‘zbekiston Prezidenti Shavkat Mirziyoyev 19-yanvar kuni qisqa muddatga Toshkentda bo‘lgan Italiya Bosh vaziri Giorgia Meloni bilan uchrashdi.
Foto: Prezident matbuot xizmati
Suhbat chog‘ida O‘zbekiston va Italiya o‘rtasidagi strategik sheriklikni mustahkamlash, iqtisodiy, madaniy va ilmiy sohalarda ko‘p qirrali hamkorlikni kengaytirish masalalari muhokama qilindi. Mirziyoyev va Meloni 2025-yil may oyida Samarqandda boʻlib oʻtgan sammitda oliy darajada erishilgan kelishuvlar izchil amalga oshirilayotganidan mamnunlik bildirdi.
Hukumat va sanoatning turli darajalarida faol muloqot davom etmoqda. Savdo hajmi va qo‘shma korxonalar soni muttasil ortib bormoqda, mintaqalararo hamkorlik, jumladan, Lombardiya bilan almashinuv ham rivojlanmoqda. Oʻzbekiston fuqarolarining Italiyaga tartibli mehnat migratsiyasini taʼminlash uchun kvotalar ajratilgan.
Finopera, ANCI, Pietro Fiorentini va Danieli kabi italiyalik hamkorlar bilan yirik sanoat loyihalari amalga oshirilmoqda. O‘tgan yili Samarqand shahrida Tusiya universitetining filiali ochilib, akademik hamkorlikning muhim bosqichi bo‘ldi.
Kelgusida ikki davlat tashqi siyosat bo‘yicha strategik muloqot, hukumatlararo qo‘mita yig‘ilishi va ikkinchi kansler forumini 2026-yilda o‘tkazishni rejalashtirgan. Muhokamalarda shuningdek, to‘qimachilik, geologiya, energetika, kimyo, qurilish materiallari va moliyaviy xizmatlar kabi muhim sohalarda qo‘shma loyihalarni ilgari surish masalalari muhokama qilindi.
Davlat rahbarlari Italiyada Oʻzbekiston kinosi kunini va Oʻzbekistonda Italiya kinosi kunini oʻtkazish, Oʻzbekistonning boʻlajak Venetsiya biennalesida ishtirok etishini qoʻllab-quvvatlash, shu yil oxirida Milanda amaliy sanʼat va muzey koʻrgazmasini oʻtkazishga kelishib oldilar.
Tomonlar xalqaro va mintaqaviy voqealar yuzasidan ham fikr almashdilar va ikki tomonlama hamkorlikni chuqurlashtirish tarafdori ekanliklarini tasdiqladilar.
Uchrashuv yakunida Prezident Mirziyoyev Bosh vazir Meloni Oʻzbekistonga navbatdagi rasmiy tashrif bilan kelishni taklif qildi.