Mahalliy
Samarqandda to‘rtta OTM qayta tashkil etiladi
Prezidentning «Samarqand viloyatidagi oliy ta’lim tashkilotlari faoliyatini yanada takomillashtirish chora-tadbirlari to‘g‘risida»gi qarori bilan viloyat oliy ta’lim tizimida keng ko‘lamli o‘zgarishlar boshlanmoqda.
Qarorga muvofiq, Samarqand davlat arxitektura-qurilish universiteti negizida Samarqand davlat texnika universiteti tashkil etiladi.
Shuningdek, Samarqand davlat universiteti tarkibiga Toshkent axborot texnologiyalari universitetining Samarqand filiali qo‘shib olinadi.
Qaror bilan Samarqand davlat pedagogika institutiga Samarqand davlat universitetining Urgut filiali qo‘shib olinadi. Mazkur filial bazasida Samarqand davlat pedagogika institutining Urgut fakulteti faoliyati yo‘lga qo‘yiladi.
Samarqand iqtisodiyot va servis instituti tarkibiga Toshkent davlat iqtisodiyot universitetining Samarqand filiali kiritiladi.
Hujjatda ta’lim sifati va ilmiy salohiyatni oshirishga ham alohida e’tibor qaratilgan. Xususan, 2026/2027-o‘quv yilidan boshlab qarorda ko‘zda tutilgan oliy ta’lim tashkilotlarining professor-o‘qituvchilari va doktorantlari xorijiy davlatlarning yetakchi oliy ta’lim hamda ilmiy-tadqiqot muassasalariga malaka oshirish va ilmiy stajirovkalarga yuboriladi.
Qarorda texnik ta’limni rivojlantirish bo‘yicha alohida vazifalar ham belgilangan. Jumladan, 2027/2028-o‘quv yilidan Samarqand davlat texnika universiteti huzurida Intellektual suv texnologiyalari ilg‘or muhandislik maktabi tashkil etiladi.