Dunyodan
Qozog‘iston Qora dengizdagi voqealardan xavotir bildirdi
Qozog‘iston Respublikasi Tashqi ishlar vazirligi Qora dengizda neft tankeri halokatidan chuqur xavotir bildirdi.
Ostona rasmiylari bu borada Yevropa elchilari bilan shoshilinch muzokaralar olib bordi, dedi Tashqi ishlar vazirligi rasmiy vakili Yerlan Jetibayev. U AQSh va boshqa xorijiy hamkorlar bilan ham aloqa o‘rnatgan. Yig‘ilishda, xususan, uglevodorodlarni dengizda tashish xavfsizligini xalqaro huquq talablari asosida ta’minlash chora-tadbirlari muhimligi ta’kidlandi.
“Tashqi ishlar vazirligi Qozogʻiston hech qanday qurolli toʻqnashuvda ishtirok etmasligi va har doim global va Yevropa energetika xavfsizligini taʼminlashga hissa qoʻshib kelayotgani hamda mamlakat energiya resurslarini xalqaro talablarga muvofiq taʼminlashda davom etishini taʼkidlaydi”, — deyiladi xabarda.
Ma’lumot uchun: Joriy yilning 13 yanvar kuni Qora dengizdagi Kaspiy dengizi quvurlari konsorsiumi yaqinidagi dengiz terminaliga yo‘l olgan uchta neft tankeriga dron hujumi uyushtirildi.
Qozog‘iston neftini tashish uchun mo‘ljallangan tankerlar barcha zarur ruxsatnomalarga ega va tegishli identifikatsiya uskunalari bilan jihozlangani aytiladi.
Ma’lumotlarga ko‘ra, dron hujumida ekipaj a’zolaridan hech kim jabrlanmagan. Tankerga hali neft yuklanmagani uchun Qozog‘istonning eksport resurslariga ta’sir ko‘rsatilmagan. Biroq, tanker biroz zarar ko’rgan.
Qozog‘iston Tashqi ishlar vazirligi bunday hodisalar so‘nggi paytlarda tez-tez sodir bo‘layotganini ta’kidlab, xalqaro energetika infratuzilmasining barqaror ishlashiga tahdid solayotgani haqida ogohlantirdi.
“Qozog‘iston hamkorlarni bunday holatlarning oldini olish uchun qo‘shma chora-tadbirlar ishlab chiqish va yaqin hamkorlikni yo‘lga qo‘yishga chaqiradi”, — deyiladi rasmiy bayonotda.