Jamiyat
Qo‘qonga yo‘l olgan «xavfli yuk» to‘xtatildi
Farg‘ona viloyatida DXX, bojxona va ichki ishlar organlari hamkorligida o‘tkazilgan tezkor tadbir davomida Qo‘qon shahriga yo‘l olgan «xavfli yuk» to‘xtatib qolindi.
Aniqlanishicha, qo‘qonlik ikki nafar shaxs (1994 va 2002-y.t.) qo‘shtepalik tanishining (2001-y.t.) «Gentra» avtomashinasida Farg‘ona tumaniga borib, qo‘shni davlatdan noqonuniy yo‘llar bilan olib kirilgan 11 650 dona «Regapen» kuchli ta’sir qiluvchi dori vositasini qabul qilib olishgan.
Guruh a’zolari ortga qaytayotgan vaqtda Uchko‘prik tumanida to‘xtatilgan. Shu paytda ular dori vositalarini mashinadan uloqtirib, voqea joyidan qochishga urinishgan, biroq tezkor xodimlar tomonidan qo‘lga olingan. Ma’lum bo‘lishicha, ushbu dorilarni Farg‘ona va Qo‘qon shaharlarida sotish rejalashtirilgan.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.