Jamiyat
Qo‘qonda yirik miqdordagi gashish va «Regapen» musodara qilindi
Qo‘qon shahrida o‘tkazilgan tezkor tadbir davomida 2 kilogrammdan ortiq gashish hamda 5600 dona kuchli ta’sir qiluvchi «Regapen» dori vositasi aniqlandi. Ularni sotishni rejalashtirgan shaxsga nisbatan jinoyat ishi qo‘zg‘atildi.
Foto: Davlat xavfsizlik xizmati
Giyohvandlik vositalari, psixotrop va kuchli ta’sir qiluvchi moddalarning noqonuniy aylanmasi hamda kontrabandasiga qarshi kurashish doirasida Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan Ichki ishlar va Bojxona organlari bilan hamkorlikda tezkor tadbir o‘tkazildi.
Tadbir davomida Qo‘qon shahrida harakatlanayotgan «Damas» rusumli avtotransport vositasi to‘xtatilib, xolislar ishtirokida ko‘zdan kechirildi. Avtomashina Farg‘ona tumanida yashovchi, 1995 yilda tug‘ilgan fuqaro tomonidan boshqarilayotgan bo‘lgan.
Tekshiruv jarayonida transport vositasi salonidan 2 kilogramm 40 gramm gashish moddasi hamda 5600 dona «Regapen» nomli kuchli ta’sir qiluvchi dori vositasi topilib, protsessual tartibda rasmiylashtirib olindi.
Tergovga qadar tekshiruvda aniqlanishicha, mazkur shaxs ushbu giyohvandlik vositalarini Qirg‘iz Respublikasidagi jinoiy sherigidan olib, Qo‘qon shahrida sotishni rejalashtirgan.
Hozirda unga nisbatan Jinoyat kodeksining 246-, 251-1 va 273-moddalari bilan jinoyat ishi qo‘zg‘atilgan. Sud qarori bilan unga nisbatan «qamoq» ehtiyot chorasi qo‘llangan.
Mutasaddilar fuqarolarni giyohvandlik vositalari savdosi bilan bog‘liq holatlar haqida DXXning 1520 qisqa raqami orqali xabar berishga chaqirmoqda.