Sport
Qishki transferlarning so‘nggi kunidagi 10 intriga
«Milan», «Yuventus» va «Atletiko»ga yangi forvard, «Liverpul»ga himoyachilar kerak. So‘nggi soatlarda kim nimaga ulguradi?
Bugun qishki transferlar oynasining so‘nggi kuni. Yevropa klublarida o‘ziga kerakli futbolchilarni topish va tarkibni kuchaytirish uchun sanoqli soatlar qolmoqda. Kuchli beshlik chempionatlarida 2 fevralga o‘tar kechasi yangi transferlarni ro‘yxatga olish to‘xtatiladi.
Quyida shu qishdayoq jamoasini o‘zgartirishi mumkin bo‘lgan futbolchilar o‘nligi keltiriladi.
Mateta bir oyog‘i bilan «Milan»da
«Milan» yanvar oyi boshida hujumchi olib bo‘lgandi – «Vest Hem»dan Niklas Fyullkrug ijaraga olingan. Ammo skudetto uchun kurashayotgan futbolchi bu bilan cheklanmoqchi emas.
Endi klub «Kristal Pelas» safida APLda so‘nggi ikki yarim mavsumda 38 gol urishga erishgan fransuz hujumchisini tarkibiga qo‘shib olish arafasida. Taniqli insayder Fabritsio Romano va Italiyadagi La Gazzetta dello Sport nashri ushbu transfer hal bo‘lganini yozishgan. Mateta tibbiy ko‘rikdan o‘tish arafasida. «Rossonerilar» futbolchi uchun 30 million yevro to‘laydi va qo‘shimcha bonuslar va’da qiladi.
Bu qishda Jan-Filipp uchun jiddiy raqobat kechdi. Avvaliga barcha u «Yuventus»ga o‘tishi haqida yozayotgandi, ammo tomonlar pul bo‘yicha ham, transfer shartlari borasida ham kelisha olishmadi – inglizlar yanvar o‘rtalarida asosiy hujumchisi uchun 40 million yevro so‘rayotgandi. Keyin futbolchi uchun kurashga «Nottinghem Forest» qo‘shildi va 35 million yevro taklif etdi – ba taklif ham rad etildi. Bunda «Pelas» o‘z yetakchisini APLdagi raqobatchisiga sotishni istamagani ham rol o‘ynadi. 28 yoshli forvardga «Tottenhem» ham qiziqqandi, ammo Randal Kolo Muani «Yuve»ga qaytmaydigan bo‘lgach, muzokaralar to‘xtagan. Yakunda futbolchining o‘zi klub rahbariyatiga ketish istagini bildirgach, italyan klubi taklifi qabul qilingan.
Bu vaqtda «Milan» Matetaga joy bo‘shatish uchun o‘tgan qishda «Chelsi»dan sotib olingan Kristofer Nkunkuni sotuvga qo‘ygan – unga «Fenerbahche» va «Roma» klublaridan takliflar bor.
«Pelas» yangi forvard kerak
Londonliklar endi Mateta o‘rniga 50 million yevro sarflab, «Vulverhempton» hujumchisi Yorgen Larsenni olib kelmoqchi. «Bo‘rilar» birinchi davrani juda yomon o‘tkazdi, norvegiyalik hujumchi esa birgina gol (penaltidan) va bir assist bilan cheklandi. Shu bilan birga, u ichki kubok o‘yinlarida yaxshi ko‘rsatkichga ega – to‘rt o‘yinda 5+1.
Katta ehtimol bilan, «Pelas» uning o‘tgan mavsumdagi ko‘rsatkichlarini ham inobatga olgan, futbolchi APLdagi debyut mavsumida «gol+pas» bo‘yicha 18 ochko jamg‘argandi, u ayniqsa finishda kuchli o‘ynagandi: oxirgi 10 turda yetti gol urib, ikki bor sheriklarini golli pas bilan ta’minlagandi.
Ammo baribir unga to‘lanayotgan yirik summani izohlash qiyin. Qolaversa, Yorgen Matetadan u qadar yosh emas – u fevralda 26 yoshga chiqadi, fransuz esa yozda 29 yoshda bo‘ladi. Aftidan, «Kristal Pelas» hozircha Eberechi Eze va Mark Geyining transferlaridan tushgan mablag‘ni to‘g‘ri tasarruf etolmayapti.
«Yuventus»ga forvard kerak
Mateta transferi barbod bo‘lganidan keyin ham «Yuventus» hujumchi qidirishdan to‘xtamadi. Lekin jamoa hozirgacha bu masalani hal qila olmadi. «Keksa sinioralar» «Fenerbahche» bilan Yussuf An-Nosiriyni ijaraga olish bo‘yicha og‘zaki kelishuvga erishgandi, ammo so‘nggi pallada marokashlik hujumchining o‘zi bunga qarshi chiqdi. U ijara asosida o‘ynashni istamadi. Bundan tashqari, An-Nosiriy maoshi miqdori kamayishiga rozi bo‘lmagan.
Shundan keyin «Yuve» e’tiborini boshqa forvardlarga qaratgandi. Yanvar oyi oxiriga kelib «Manchester Yunayted»dan Joshua Zirkzeye va «Liverpul»dan Federiko Kiyeza variantlari muhokama qilindi, shuningdek, «Tottenhem»da ijara asosida o‘ynayotgan Randal Kolo Muanini Turinga qaytarish masalasi ko‘rib chiqilgan. Ammo yakshanba kuni insayder Di Marsio «Yuventus» hozirda «Galatasaroy»da o‘ynayotgan Mauro Ikardi bo‘yicha muzokara olib borayotganini xabar qildi. Argentinalik hujumchi transferini u bilan «Inter»da hamkorlik qilgan Luchano Spalletti istamoqda. Manbaga ko‘ra, turinliklar klubi Ikardiga bir yarim yillik shartnoma taklif qilgan.
«Inter»ga yarimhimoyachi kerak
Italiya chempionati peshqadami anchadan buyon yarimhimoyachi qidirmoqda. Yanvar oyi boshidan buyon Kyortisom Djonsom iz «Liverpul» futbolchisi Kyortis Jons va «Al-Ittihod»da o‘ynayotgan Mussa Diabi nomlari «Inter» bilan bog‘lab kelindi. Ammo ushbu ikki klub ham o‘z futbolchilarini qo‘yib yuborishni istamadi. «Inter» 36 yoshli Ivan Perishichni qaytarish masalasida ham PSV bilan kelisha olmadi.
Transferlar oynasi oxiriga kelib jamoa yana Jons variantiga qaytgan. Ayrim manbalarga ko‘ra, mersisaydliklar ustozi Arne Slot va futbolchi o‘rtasida jiddiy ziddiyat kelib chiqqan va bu futbolchining ketishi bilan yakunlanishi mumkin. Unga «Inter»dan tashqari «Tottenhem»dan ham qiziqish mavjud.
Ammo italyanlar klubida imkoniyat yuqori deyish mumkin. Chunki mersisaydliklar «Inter» himoyachisi Denzel Dumfrisni o‘z safida ko‘rishni istamoqda.
«Liverpul»ga himoyachi kerak-1
«Liverpul» Frimpongning muntazam jarohat olishidan charchadi va himoya chizig‘ini mustahkamlashga harakat qilmoqda. Denzel Dyumfris haqidagi xabar A Seriyaga ixtisoslashgan insayder Janluka Di Marsio va Sky Sport Italia nashri tomonidan tarqatildi. FCInter1908 nashri jurnalisti Daniele Mari ham bu ma’lumotni tasdiqladi: «Liverpul» Dyumfrisni shu qishdayoq olmoqchi. Ammo muhim nyuans bor.
Niderlandiyalik futbolchi noyabrdan buyon o‘ynamayapti – u to‘piq qismidan jiddiy jarohat olgan va jarrohlik amaliyotini boshdan kechirgan. U martgacha maydonga qaytishi kutilmayapti, bu esa ushbu transferni kamida yozgacha kechiktirishi mumkin. Agar mersisaydliklar u tezroq sog‘ayishiga kafolat olishsa, transfer amalga oshishi mumkin.
«Inter» shartnomasi yakuniga yarim yil qolgan futbolchi uchun 25 million yevro to‘laydi. Denzelni yozda tekinga qo‘lga kiritish ham mumkin. Ammo yozda unga raqobat jiddiy bo‘ladi. Xususan, «Manchester Siti» ustozi Pep Gvardiola ham uni o‘z jamoasida ko‘rishni istamoqda. Shuningdek, «Barselona» ham anchadan buyon uning atrofidagi vaziyatni kuzatib kelmoqda.
«Liverpul»ga himoyachi kerak-2
Lutsharel Gertreyda hozirda «Sanderlend»da ijara asosida o‘ynamoqda: u o‘tgan 23 turdan 20 tasida qatnashdi, 10 marta boshlang‘ich tarkibdan o‘rin oldi. Liverpulliklar uni birinchi navbatda jarohatga moyil Frimpongga o‘rinbosar sifatida ko‘rmoqda. Ammo Gertreyda markaziy himoyachi yoki tayanch yarimhimoyachisi pozitsiyalarida ham o‘ynay oladi.
Jamoa ushbu futbolchini qo‘lga kiritish uchun «Sanderlend» bilan ham, uning asl klubi «Leypsig» bilan ham kelishishi kerak. U Arne Slotning nomzodi ekani aniq – Gertreyda «Feyyenord»da uch mavsum davomida ushbu mutaxassis qo‘l ostida to‘p surgan.
Bundan tashqari, agar Endryu Roberson «Tottenhem»ga ketadigan bo‘lsa, qizillar Kostas Tsimikasni «Roma»dan ijaradan qaytarishi mumkin.
«Liverpul»ga himoyachi kerak-3
Qishki transferlar oynasida Yevropa top-klublari uchun eng jozibali figura – «Renn» markaziy himoyachisi Jyeremi Jake bo‘ldi. Fransiya milliy jamoasining 20 yoshli a’zosi tez orada APLda o‘ynay boshlaydi.
Yanvar oyi boshida OAV va turli insayderlar Jakega «Chelsi» va «Manchester Yunayted» tomonidan qiziqish haqida yozishgandi. Oy o‘rtalariga kelib RMC Sport londonliklar klubi «Renn»ga 50 mln yevro to‘lamoqchiligi, ammo fransuzlarni bu taklif qoniqtirmayotganini xabar qildi. Jamoa yosh iste’dod transferidan kamida 60 mln yevro ishlab olishni ko‘zlagandi. Sotuvchi va xaridor o‘rtasidagi muzokaralarga parallel ravishda «Chelsi» Jyeremi bilan shaxsiy shartnoma borasida ham kelishib qo‘ygandi. Ammo transfer barbod bo‘ldi.
Transferlar oynasi oxiriga kelib Fabritsio Romano Jake «Liverpul»ga o‘tishi, inglizlar transfer uchun 60+10 mln yevro to‘lashini xabar qildi, ammo futbolchi mersisaydliklar a’zosi bo‘lganini aytishga hali erta – Romano kabi insayderlar ham vaqti-vaqti bilan xatoga yo‘l qo‘yib turadi.
«Atletiko»ga hujumchi kerak
Ademola «Atalanta»dagi eng yomon mavsumini o‘tkazmoqda. Barchasi yozda, nigeriyalik hujumchi o‘zini sotishni talab qilib, mashg‘ulotlarda qatnashishdan bosh tortganidan boshlangandi. U kuz davomida bosh murabbiy Ivan Yurich bilan bir necha bor janjallashdi va fevralga kelib atigi ikki gol urdi.
Fabritsio Romano xabariga ko‘ra, Lukmanga «Fenerbahche» tomonidan jiddiy qiziqish bo‘lgan. Turklar bir necha hafta davomida futbolchini ko‘ndirishga harakat qilishgan va yakunda klub bilan ham 40 million yevroga transfer qilish borasida kelishishgan. Ammo kelishuv amalga oshmadi – tomonlar to‘lovni amalga oshirish sharti bo‘yicha kelisha olmagan, italyanlar mablag‘ning bir qismini oldindan o‘tkazib berishni talab qilishgan.
Yakunda «Atletiko» varianti paydo bo‘lgan. Italiya klubi 35+5 million yevrolik taklifga rozi bo‘lgan. Ammo endi «Atalanta» madridliklarga to‘lov bo‘yicha hech qanday shart qo‘ymagan. Ispaniyada Lukmanning maoshi miqdori Turkiyadagilar taklif qilganidan ikki barobar kamroq bo‘ladi.
Bundan tashqari, «Atletiko» 2024 yil yozida «Benfika»dan «Al-Hilol»ga o‘tgan Leonardoni ham Yevropaga qaytarmoqchi. Fabritsio Romano ma’lumotiga ko‘ra, «matraschilar» futbolchi bilan kelishuvga erishgan, Saudiya klubiga esa ijara bo‘yicha taklif yuborilgan.
Benzema Saudiyadan ketmoqchi
Fransuz hujumchisi va «Al-Ittihod» o‘rtasida mojaro yuzaga kelgan: futbolchi navbatdagi tur o‘yinida maydonga tushishdan va yangi shartnoma imzolashdan bosh tortgan. Karim arablarning yangi shartnoma bo‘yicha taklifini o‘ziga nisbatan hurmatsizlik sifatida qabul qilgan – shartnomada Benzemaning maoshi uning imij huquqidan keladigan daromadga bog‘lab qo‘yilgan. Agar tomonlar yarashib olmasa, hujumchi yoki yozgacha, shartnomasi muddati tugagunga qadar boykotni davom ettiradi, yoki hozir boshqa klubga o‘tadi.
Italiyadagi Tuttosport nashri «Yuventus» Karim bilan shartnoma imzolashni o‘ylayotgani haqida yozgan. Ammo buning uchun «Oltin to‘p» sohibi maoshi qisqarishiga rozi bo‘lishi kerak bo‘ladi. Turkiyalik insayder Akrom Konur esa «Beshiktosh» varianti haqida yozgan. Turklar jamoasi transferni tezlashtirish uchun 3 million yevro to‘lov qilishga ham tayyor. Shuningdek, MLS klublari va «Lion» variantlari ham bor.
Kante Saudiyadan ketmoqchi
N’Golo Kante ham «Al-Ittihod»da o‘tgan ikki yarim yildan keyin Yevropaga qaytishi mumkin. 34 yoshli fransuz uchun asosiy da’vogar sifatida «Fenerbahche» nomi tilga olinmoqda. Insayder Florian Plettenberg ushbu tayanch yarimhimoyachisi istanbulliklar klubi taklifini qabul qilgani va Turkiya chempionatiga o‘tish uchun maoshi kamayishiga ham rozi bo‘lganini xabar qilgan. Spors Digitale xabariga ko‘ra, «Fenerbahche» yozda erkin agentga aylanishi mumkin bo‘lgan Kanteni hozirning o‘zida safga qo‘shib olish uchun 4 mln yevro taklif qilmoqda va «Al-Ittihod»ning javobini kutmoqda. Saudiyaliklar esa mavsum yarmida yulduz futbolchisi bilan xayrlashishga shoshilmayapti.
Shu bilan birga, «Fenerbahche» futbolchi uchun yagona variant emas. Qishki transferlar oynasi ochilishidan oldinroq L’Équipe Kanteda Angliya va Fransiyadan variantlar borligini xabar qilgandi. Yanvar oyi oxirida insayder Romano APL klublaridan biri N’Golo uchun istanbulliklar bilan raqobat qilishi mumkinligini xabar qildi. U aynan qaysi klub haqida gap ketayotganiga aniqlik kiritmagan. Fransuzning Angliya chempionatiga qaytishi masalasi uning agenti bilan muhokama qilingani qayd etilgan.