Iqtisodiyot
Putin xorijiy aktivlarni milliylashtirish haqidagi farmonni imzoladi
Moskva Yevropa Ittifoqidagi Rossiya mulkining musodara qilinishi ehtimoliga javoban xorijiy aktivlarni musodara qilish va sotishga tayyor. Yangi mexanizm xususiylashtirishni tezlashtiradi va simmetrik choralarni joriy qiladi.
Foto: Vyacheslav Prokofev/TASS/ZUMA/picture alliance
Rossiya prezidenti Vladimir Putin mamlakatdagi xorijiy kompaniyalarning aktivlarini ommaviy milliylashtirish va tezkor sotishga ruxsat beruvchi farmonni imzoladi, deb xabar berdi Bloomberg 1 oktyabr, chorshanba kuni hukumatga yaqin manbaga tayanib. Hujjat jadallashtirilgan xususiylashtirish tartibini joriy qiladi va Yevropa Ittifoqi Rossiyaning xorijdagi aktivlarini musodara qilishga qaror qilgan taqdirda u qo‘llanishi mumkin.
Agentlik manbasiga ko‘ra, farmon ham Rossiya, ham xorijiy aktivlarni tezkor sotish imkoniyatini ko‘zda tutadi. Rossiyada faoliyat yuritayotgan kompaniyalar sirasiga UniCredit, Raiffeisen Bank International, PepsiCo va Mondelez International kiradi.
Yevropa Ittifoqi yetakchilari Daniyada bo‘lib o‘tgan yig‘ilishda Ukrainaga muzlatilgan Rossiya zaxiralari kafolati ostida 140 milliard yevro miqdorida kredit berish rejasini kelishib oldi. Bu qaror AQSh Kiyevga to‘g‘ridan to‘g‘ri moliyaviy yordam berishni to‘xtatib, Yevropani Rossiyaning qurolli bosqiniga qarshi kurashda asosiy donor sifatida qoldirganidan keyin Rossiya Markaziy banki aktivlaridan foydalanish masalasini qayta ochdi.
Kreml matbuot kotibi Dmitriy Peskov Yevropa Ittifoqi rejasini «Rossiya mulkini noqonuniy tortib olish, o‘g‘irlik» deb atadi. Putin avvalroq G‘arbning bunday qadamlari «global moliyaviy tartibni buzishi» haqida ogohlantirgan edi.