Dunyodan
Prezident Tramp favqulodda holat e’lon qildi
Kuba tomonidan milliy xavfsizlikka tahdid solayotgani sababli AQShda favqulodda holat e’lon qilindi. Hujjatni AQSh prezidenti Donald Tramp imzolagan.
“Men, Donald Tramp, AQSh prezidenti sifatida, Kuba bilan bog‘liq vaziyat Qo‘shma Shtatlarning milliy xavfsizligi va tashqi siyosatiga favqulodda xavf tug‘diradi, uning ildizlari to‘liq yoki asosan xorijda, deb hisoblayman va shu bilan ushbu tahdid munosabati bilan milliy favqulodda holat e’lon qilaman”, — deyiladi Oq uy saytida e’lon qilingan hujjatda.
Favqulodda holat bilan bog’liq muammoni hal qilish uchun Prezident Tramp tarif tizimini joriy etishni taklif qildi. Unda aytilishicha, Kubaga neftni toʻgʻridan-toʻgʻri yoki bilvosita sotuvchi yoki yetkazib beruvchi xorijiy mamlakatlarda ishlab chiqarilgan tovarlar importiga qoʻshimcha bojlar kiritilishi mumkin.
11-yanvar kuni prezident Tramp Kuba endi Venesueladan neft va moliyaviy resurslarni olmasligini e’lon qildi, Gavanani kelishuvga erishishga chaqirdi va Kubani jiddiy oqibatlar bilan tahdid qildi. Oq uy rahbarining so‘zlariga ko‘ra, Qo‘shma Shtatlar “u yerga kirib, hamma narsani portlatib yuborishdan” boshqa chorasi yo‘q.
28 yanvar kuni AQSh Davlat kotibi Marko Rubio Venesuela prezidenti vazifasini bajaruvchi Delsay Rodriges Kubaga neft yetkazib berishni butunlay to‘xtatishga va’da berganini ma’lum qildi.
Politico nashrining yozishicha, Tramp ma’muriyati Kubaga qarshi yangi choralar, jumladan, neft importining oldini olish uchun to‘liq dengiz blokadasi o‘rnatish imkoniyatini ko‘rib chiqmoqda. Jurnalistlarning qayd etishicha, AQSh Davlat kotibi respublikadagi hokimiyatni o‘zgartirishga qaratilgan bunday choralarni qo‘llab-quvvatlaydi.