Siyosat
O‘zbekiston Vatikanga yangi elchi tayinladi
Faruk Tursunov Rim papasi Leo XIVga ishonch yorliqlarini topshirdi.
Madridda joylashgan O‘zbekistonning yangi Favqulodda va muxtor elchisi Faruk Tursunov Vatikandagi Apostollar saroyida Rim-katolik cherkovi rahbari Rim papasi Leo XIV ga ishonch yorliqlarini topshirdi.
Marosimdan keyingi suhbatda elchi Rim papasini O‘zbekistonda amalga oshirilayotgan keng ko‘lamli siyosiy, iqtisodiy va ijtimoiy islohotlar, shuningdek, demokratik institutlarni mustahkamlash bo‘yicha ko‘rilayotgan qadamlar haqida ma’lumot berdi.
Janob Tursunov Prezident Shavkat Mirziyoyev nomidan Rim papasiga davlat rahbarining samimiy salomi va ezgu tilaklarini yetkazdi.
Rim papasi Leo XIV O‘zbekiston prezidenti va xalqiga chuqur hurmatini izhor etdi. U Vatikan va O‘zbekiston o‘rtasida diplomatik munosabatlar o‘rnatilganidan buyon o‘tgan 33 yil davomida turli millat va konfessiyaga mansub xalqlar o‘rtasida do‘stlik va o‘zaro hamjihatlikni mustahkamlashga qaratilgan hamkorlikning mustahkam asosi shakllanganini ta’kidladi.
Rim papasi Samarqandning Sharq va Gʻarb olamiga taʼsir koʻrsatgan yirik falsafiy va diniy tafakkur markazi sifatidagi ahamiyatiga alohida eʼtibor qaratgan.
Uchrashuv yakunida Rim papasi Leo XIV Shavkat Mirziyoyevga farovonlik va O‘zbekiston xalqiga farovonlik tilab, ikki davlat o‘rtasidagi do‘stona munosabatlar va konstruktiv hamkorlik yanada mustahkamlanishiga umid bildirdi.
Ma’lumot uchun, janob Tursunov O‘zbekistonning Ispaniya va Andorradagi elchisi sifatida ham faoliyat yuritadi.