Sport
O‘zbekiston milliy jamoasi Toshkentdagi FIFA Series 2026 turnirida ishtirok etadi
Mart oyida bo‘lib o‘tadigan musobaqada Gabon, Trinidad va Tobago, shuningdek, Venesuela ham ishtirok etadi.
Xalqaro futbol federatsiyasi (FIFA) dunyo bo‘ylab o‘tkaziladigan FIFA Series 2026 turnirlari tarkibini e’lon qildi.
Mart oyida o‘tkaziladigan turnirlardan biriga Toshkent mezbonlik qiladi. Unda O‘zbekiston milliy jamoasi bilan birga Gabon, Trinidad va Tobago, shuningdek, Venesuela ham ishtirok etadi. O‘yinlar yarimfinal va final sxemasi bo‘yicha o‘tkaziladi, taqvim keyinroq e’lon qilinadi.
Qayd qilinishicha, FIFA Series 2026 turnirlarida qirq sakkizta milliy jamoa, ya’ni jahon futbol hamjamiyatining deyarli to‘rtdan bir qismi ishtirok etadi. Barcha o‘yinlar butun dunyo bo‘ylab translatsiya qilinadi.
Erkaklar o‘rtasidagi bahslarga Avstraliya, Ozarboyjon, Indoneziya, Qozog‘iston, Yangi Zelandiya, Puerto-Riko, Ruanda va O‘zbekiston mezbonlik qiladi. Ayollar o‘rtasidagi musobaqalar Braziliya, Kot-d’Ivuar va Tailandda bo‘lib o‘tadi.
Turnirda ishtirok etayotgan beshta erkaklar milliy jamoasi – Avstraliya, Kabo-Verde, Kyurasao, Yangi Zelandiya va O‘zbekiston 2026 yilgi jahon chempionati ishtirokchisi sanaladi.
Erkaklar guruhlari
Avstraliya (mezbon) – Avstraliya, Kamerun, Xitoy, Kyurasao
Ozarboyjon – Ozarboyjon, Ummon, Siyerra-Leone, Sent-Lyusiya
Indoneziya – Bolgariya, Indoneziya, Sulaymon orollari, Sent-Kits va Nevis
Qozog‘iston – Qamar orollari, Qozog‘iston, Kuvayt, Namibiya
Yangi Zelandiya – Kabo-Verde, Chili, Finlyandiya, Yangi Zelandiya
Puerto-Riko – Amerika Samoasi, Guam oroli, Puerto-Riko, AQSh Virjiniya orollari
Ruanda (A guruhi) – Estoniya, Grenada, Keniya, Ruanda
Ruanda (B guruhi) – Aruba, Lixtenshteyn, Makao, Tanzaniya
O‘zbekiston – Gabon, Trinidad va Tobago, O‘zbekiston, Venesuela
Ayollar guruhlari
Braziliya – Braziliya, Kanada, Janubiy Koreya, Zambiya
Kot-d’Ivuar – Kot-d’Ivuar, Mavritaniya, Pokiston, Tyorks va Kaykos orollari
Tailand – Kongo DR, Nepal, Okeaniya jamoasi, Tailand