Sport
Norvegiya oltin medallar soni bo‘yicha qishki Olimpiada rekordini o‘rnatdi
Italiyaning Milan va Kortina d’Ampetsso shaharlarida o‘tkazilayotgan qishki Olimpiya o‘yinlarida jamoa 17 ta oltin medalni qo‘lga kiritdi.
Norvegiya terma jamoasi bitta Olimpiadada qo‘lga kiritilgan oltin medallar soni bo‘yicha rekord o‘rnatdi.
Italiyaning Milan va Kortina d’Ampetsso shaharlarida o‘tkazilayotgan qishki Olimpiya o‘yinlarida jamoa 17 ta oltin medalni qo‘lga kiritdi. Shuningdek, norvegiyalik sportchilar hisobida 9 ta kumush va 10 ta bronza medali ham bor.
Norasmiy umumjamoa hisobida Norvegiya yetakchilik qilmoqda. Ikkinchi o‘rinda amerikaliklar, uchinchi o‘rinda italiyaliklar.
Avvalgi yutuq ham Norvegiya terma jamoasiga tegishli edi. 2022 yilda Pekinda bo‘lib o‘tgan qishki Olimpiya o‘yinlarida norvegiyaliklar 16 ta oltinga ega chiqqan.
Italiyadagi Olimpiadada norvegiyalik chang‘ichi Yohannes Klebo oltin medallar soni bo‘yicha qishki o‘yinlar rekordini o‘rnatdi. U 10 karra Olimpiya chempioni. Norvegiyalik sportchi bunday sovrinlar soni bo‘yicha uch nafar hamyurti – chang‘ichilar Byorn Deli va Marit Byorgen, shuningdek, biatlonchi Ole-Eynar Byorndalendan o‘zib ketdi (ularning har birida sakkiztadan sovrin bor edi).
Qishki Olimpiya o‘yinlari 22 fevralda yakunlanadi.