Jamiyat
Navoiyda xususiy bog‘cha tarbiyachisi bolalarni kaltakladi
Tarbiyachi ishdan bo‘shatildi, bog‘chaning faoliyati esa vaqtincha to‘xtatildi.
Navoiy viloyatidagi xususiy bog‘chada tarbiyachi bolalarni kaltakladi. Ushbu holat aks etgan video Kun.uz tahririyati ixtiyoriga kelib tushdi.
Tasvirlarda tarbiyachi bolalarga o‘ta qo‘pol munosabatda bo‘lgani, ularni urgani ko‘rinadi. Murojaatchilarga ko‘ra, ushbu holat Navoiy shahrida joylashgan “Amin Kids” nomli bog‘chada yuz bergan.
Viloyat Maktabgacha va maktab ta’limi boshqarmasi holat yuzasidan rasmiy munosabat bildirdi.
Ta’kidlanishicha, vaziyat o‘rganib chiqilgan va bog‘cha tarbiyalanuvchilariga nisbatan qo‘pol muomala qilgan hamda pedagogik etika va kasbiy me’yorlarga zid harakatlarga yo‘l qo‘ygan tarbiyachi bilan tuzilgan mehnat shartnomasi bekor qilingan.
Shuningdek, bog‘cha faoliyati vaqtincha to‘xtatilgan.
Bolalar ombudsmani Kun.uz muxbiri bilan suhbatda holat nazoratga olinganini, ko‘rilgan choralar haqida qo‘shimcha ma’lumot berilishini bildirdi.
Eslatib o‘tamiz, 6 aprel kuni Toshkent viloyatida bolani uxlamagani uchun haqoratlab, uni urgan tarbiyachi ishdan olingani xabar qilingandi.