Iqtisodiyot
Mahalliy ishlab chiqaruvchilarga yangi qo‘llab-quvvatlash choralari va’da qilindi
Tadbirkorlardan biri eksportdagi transport xarajatlarini qoplab berishni so‘radi. Bosh vazir o‘rinbosari Jamshid Xo‘jayev bunday imtiyoz Jahon savdo tashkiloti qoidalariga zidligini aytib, tashkilot qoidalariga mos keladigan boshqa choralarni ko‘zda tutuvchi qaror loyihasi ishlab chiqilayotganini aytdi. “Kutib turinglar, biz boshqacha qo‘llab-quvvatlov yo‘llarini albatta joriy etamiz”, dedi u.
Jamshid Xo‘jayev / Savdo-sanoat palatasi efiridan kadr
O‘zbekiston bosh vaziri o‘rinbosari Jamshid Xo‘jayev boshchiligidagi hukumat komissiyasining tadbirkorlar bilan navbatdagi ochiq muloqoti 14 fevral kuni bo‘lib o‘tdi. Unda meva-sabzavoti va oziq-ovqat eksportchilarining murojaatlari tinglandi.
Muloqotda Samarqand viloyatidagi “Tina Agro Narpay” MChJ ta’sischisi Ahror Abdujalilov so‘z olib, O‘zbekiston dengizdan uzoqda joylashgani uchun mahalliy ishlab chiqaruvchilar xorijiy bozorlarda raqobat qilishga qiynalayotgani, chunki transport xarajatlari qimmatligini aytib, transport subsidiyalarini ajratishni so‘radi.
Jamshid Xo‘jayev bunday chora Jahon savdo tashkiloti qoidalariga zidligini eslatib, hukumat qo‘llab-quvvatlashning boshqacha yo‘llarini izlayotganini aytdi.
“O‘zbekiston Jahon savdo tashkilotiga a’zo bo‘lish jarayonida. Boshqa eksportyorlarimizga ham bitta narsani eslatib qo‘ymoqchiman: eksport jarayonida transport xarajatlarini to‘g‘ridan to‘g‘ri davlat tomonidan qoplab berish – JSTdagi haqqoniy raqobat qonun-qoidalariga umuman zid. Shuning uchun, prezidentimiz topshiriq berganlar, qaror loyihasi: nafaqat eksportchilarga, umuman ishlab chiqaruvchilarga, ayniqsa oziq-ovqat ishlab chiqaruvchilarga qo‘llab-quvvatlash mexanizmlari tayyorlanmoqda.
Bunda siz aytayotgan transport xarajatlari emas, boshqa qonuniy, [JST qoidalariga] to‘g‘ri keladigan yo‘llar bilan qo‘llab-quvvatlash masalasi ko‘rib chiqilmoqda.
Men to‘g‘ri tushunishinglarni iltimos qilaman: boshqa davlatlardagi tariflarni, to‘siqlarni olib tashlashni bizdan so‘raysizlar, lekin bu to‘siqlarni olishning eng oson, eng to‘g‘ri yo‘li – JSTga qo‘shilish”.
Xo‘jayev so‘zining yakunida ishlab chiqaruvchilarga va’da berdi:
“Hurmatli ishlab chiqaruvchilarimiz, kutib turinglar, biz boshqacha qo‘llab-quvvatlov yo‘llarini albatta joriy etamiz”.
Eslatib o‘tamiz, O‘zbekiston JSTga a’zo bo‘lish yo‘lida eksportyorlarga transport xarajatlarini qisman qoplab berishga oid imtiyozlarni 2025 yil 1 yanvardan bekor qilgan.