Jamiyat
Mahallalar, turistik maskanlar va maktablarda qo‘riqlash kuchaytiriladi
Yangi chora-tadbirlar doirasida mahallalar, turistik infratuzilma obektlari, ommaviy dam olish joylari va ta’lim muassasalarida qo‘riqlash tizimi bosqichma-bosqich kuchaytiriladi.
Qarorga ko‘ra, Milliy gvardiya Qo‘riqlash bosh boshqarmasi Ichki ishlar vazirligi huzuridagi Qo‘riqlash departamenti etib qayta tashkil etildi. Departament:
shartnoma asosida davlat, o‘ta muhim, toifalangan va boshqa obektlar, ta’lim muassasalari, savdo, xizmat ko‘rsatish, ko‘ngilochar va qurilish obektlarini zamonaviy usullar orqali qo‘riqlaydi;
qo‘riqlanayotgan obektlarda ichki tartib va nazorat rejimlarini ta’minlaydi;
qo‘riqlash faoliyatiga zamonaviy axborot-kommunikatsiya vositalari va sun’iy intellekt texnologiyalarini keng joriy etadi;
qo‘riqlanadigan obektlarga o‘rnatilgan qo‘riqlash texnik vositalari va tizimlariga xizmat ko‘rsatish huquqiga ega bo‘ladi.
Kriminogen vaziyati og‘ir hududlardagi mahalla huquq-tartibot maskanlari tuzilmasiga qo‘riqlash xizmati inspektori lavozimi kiritiladi. Shuningdek, shunday hududlarda, turistik infratuzilma obektlarida va ommaviy dam olish joylarida Qo‘riqlash departamentining qo‘riqlash-patrul xizmati naryadlari tashkil etiladi.
Qarorda “Xavfsiz ta’lim” konsepsiyasi joriy etilishi ham nazarda tutilgan bo‘lib, u quyidagilarni o‘z ichiga oladi:
davlat va nodavlat ta’lim tashkilotlari, shuningdek xorijiy ta’lim muassasalari filiallarini shartnoma asosida jismoniy va texnik qo‘riqlash tizimlari orqali himoya qilish;
ta’lim muassasalarida qo‘riqlash signalizatsiyalari, “tashvish tugmalari”, videokuzatuv moslamalarini o‘rnatish va ularga texnik xizmat ko‘rsatish.