Sport
Jahon chempionatida irqchilik holatlari yuz bersa, o‘yin butunlay to‘xtatiladi
FIFA Jahon chempionatida irqchilik haqida shikoyat qilish uchun maxsus ishora joriy etdi.
Futbol bo‘yicha jahon chempionatida hakamlarning e’tiborini irqchilik ko‘rinishlariga qaratish uchun maxsus ishora qo‘llaniladi. Jurnalist Henri Vinterning xabar berishicha, futbolchilar qo‘llarini ko‘krak oldida X ko‘rinishida chalishtirishi kerak bo‘ladi.
Hakam imo-ishorani ko‘rishi bilanoq, Xalqaro futbol federatsiyasining (FIFA) «No Racism» (Irqchilikka yo‘q) kampaniyasi doirasida uch bosqichli jarayonni boshlashga majbur bo‘ladi. Birinchi epizodda o‘yin to‘xtatiladi, agar haqoratlar davom etsa, o‘yinda 15 daqiqalik tanaffus e’lon qilinadi va futbolchilar maydonni tark etadi. Uchinchi marta hodisa yuz bersa, o‘yin butunlay to‘xtatiladi.
Ushbu ishora qoidasi ilk bor 20 yoshgacha bo‘lgan ayollar o‘rtasidagi jahon chempionatida sinovdan o‘tkazildi. Turnir 2024 yilda Kolumbiyada bo‘lib o‘tdi.
2026 yilgi jahon chempionati 11 iyundan 19 iyulgacha AQSh, Kanada va Meksikada bo‘lib o‘tadi. Chempionatda 48 ta jamoa, jumladan tarixda birinchi marta O‘zbekiston ham ishtirok etadi.