Jamiyat
Farg‘onada 14 yoshli qiz bir necha shaxs tomonidan zo‘rlandi
Farg‘ona viloyati Uchko‘prik tumanida 14 yoshli voyaga yetmagan qiz bir necha shaxs tomonidan jinsiy zo‘ravonlikka uchradi. Holat yuzasidan jinoyat ishi qo‘zg‘atilib, gumonlanuvchilar qamoqqa olingan.
Ijtimoiy tarmoqlarda tarqalgan ma’lumotlarga ko‘ra, voqea 2026 yil 9 yanvar kuni sodir bo‘lgan. Aytilishicha, voyaga yetmagan qizga nisbatan zo‘ravonlik sodir etgan to‘rt nafar yigit 2002 yilda tug‘ilgan.
Ijtimoiy himoya milliy agentligi Kun.uz’ga ushbu holat bo‘yicha Jinoyat kodeksining 118-moddasi (nomusga tegish) 3-qismi “a” bandi bilan jinoyat ishi qo‘zg‘atilganini ma’lum qildi.
“Hozirda holat yuzasidan Uchko‘prik tumani IIB tomonidan jinoyat ishi qo‘zg‘atilib, dastlabki tergov harakatlari olib borilmoqda. Gumonlanuvchilar tegishli tartibda qo‘lga olingan. Ijtimoiy himoya milliy agentligi rahbariyati huquq-tartibot organlari bilan uzviy hamkorlikda mazkur holatni alohida nazoratga olgan.
Aybdor deb topilganlar belgilangan tartibda jinoiy javobgarlikka tortiladi. Ayni paytda “Inson” ijtimoiy xizmatlar markazi xodimlari tomonidan psixologik va yuridik xizmatlar ko‘rsatilmoqda», deyiladi agentlik xabarida.
Bolalar ombudsmani ham Kun.uz’ga gumonlanuvchilar qamoqqa olinganini, ammo mazkur jinoyat ishiga doir tafsilotlarni keng jamoatchilikka ochiqlash bola manfaatlariga zid hisoblanishini ma’lum qildi.
«Holat yuzasidan jinoyat ishi o‘z vaqtida tezkor qo‘zg‘atilgan, hozirda dastlabki tergov harakatlari olib borilyapti. Gumonlanuvchilar ushlanib, ularga qamoq ehtiyot chorasi qo‘llangan. Bolalar ombudsmani o‘z vakolati doirasida mazkur ish yuzasidan bola manfaatlari nuqtai nazaridan kuzatuv olib bormoqda.
Bolalar ombudsmani holat yuzasidan o‘z kuzatuvini olib borgan holda ta’kidlaydiki, mazkur jinoyat ishiga tegishli holatlarni batafsil ochiqlash bola manfaatiga zid bo‘lib, bolaga oid ma’lumotlar OAVda keng tarqalishi jabrlanuvchi-bolaning huquqlariga zarar yetkazadi», deyiladi ma’lumotda.
Avvalroq, Surxondaryoda 9-sinf o‘quvchisi o‘z maktabdoshi tomonidan zo‘rlangandi.