Sport
Eronlik futbolchilar Minob qurbonlarini xotirladi
Eron milliy jamoasi Turkiyaning Belek shahrida Nigeriya milliy jamoasiga qarshi o‘tkazilgan o‘rtoqlik uchrashuvi oldidan aksiya o‘tkazishdi. Fors futbolchilari maydonga binafsharang va pushti aralash och qizil ryukzaklarni ko‘tarib chiqishdi va milliy madhiya ijro etilayotganida ularni ko‘tarib turishdi.
Bu orqali futbolchilar AQSh va Isroilning Eronga qarshi urushining ilk kunida Minob shahridagi Shajarayi Toyyiba nomli qizlar maktabiga yo‘llangan zarba qurbonlarini yod etishdi. 28 fevral kuni ushbu maktabga raketa kelib tushishi oqibatida 170 dan ortiq kishi halok bo‘lgan, ularning aksari o‘quvchilar edi.
Eron futbol federatsiyasi vitse-prezidenti Muhammad Nabi bunday aksiya o‘tkazish tashabbusi futbolchilarning o‘zidan chiqqani, ular bu orqali qizlarning oila a’zolariga hamdardlik izhor etishni istashganini qayd etgan.
AQSh harbiylari maktabga xatolik tufayli zarba yo‘llagandi. Bu xatolik amaliyotda eskirgan razvedka ma’lumotlaridan foydalanilgani tufayli ro‘y bergan. Ammo hozircha AQSh tomoni buni rasman tan olmagan va faqat holat yuzasidan tekshiruv o‘tkazilayotganini ma’lum qilish bilan cheklanmoqda.