Iqtisodiyot
AESda ishlab chiqarilgan 1 kWh elektr narxi 1000 so‘mdan past bo‘ladi
“O‘zatom” rahbari Azim Ahmadxo‘jayev AESda ishlab chiqariladigan elektr energiyasi narxi haqidagi savolga javob berdi. U yakuniy narx haqida aniq ma’lumot ayta olmasligi, lekin bir kWh uchun 1000−1100 so‘mdan oshib ketmasligini bildirdi.
O‘zbekistonda integratsiyalashgan atom elektr stansiyasida ishlab chiqarilgan elektr energiyasi narxi har kWh uchun 1000 so‘mdan past bo‘ladi. Bu haqda Atom energiyasi agentligi direktori Azim Ahmadxo‘jayev ma’lum qildi, deya xabar berdi Spot.
“Bizda bosqichma-bosqich yondashuv mavjud. Hozir aniq narx haqida gapirmagan bo‘lardim, lekin shuni aytishim mumkinki, u [elektr energiyasi] uchun joriy tariflarning o‘rtacha parametrlarida”, — degan Ahmadxo‘jayev.
“O‘zatom” rahbarining ta’kidlashicha, tariflarni belgilashda mamlakat elektr energiyasi bozorining rivojlanishi, jumladan, joriy yilning yanvar oyida e’lon qilingan energetika va kommunal sektorning yagona regulyatorini yaratish hisobga olinadi.
“Ha, bizda hozircha iqtisodiy hisob-kitoblar bor, lekin birinchi elektr energiyasi yetkazib berila boshlanganda u qanday bo‘lishini aniq ayta olmayman”, — degan Ahmadxo‘jayev
Spot muxbirining AESda ishlab chiqariladigan elektr energiyasi narxi bir kWh uchun 1000−1100 so‘mdan oshib ketadimi, degan savoliga O‘zatom rahbari: “Yo‘q, albatta, undan past bo‘ladi”, — deya javob qaytargan.