Oliy sud diniy ekstremistik va terroristik, deb topilgan hamda O‘zbekistonga olib kirish, tarqatish taqiqlangan manba va kontentlarning yangi ro‘yxatini e’lon qildi.

Din ishlari bo‘yicha qo‘mita

Oliy sud internet jahon tarmog‘idagi diniy ekstremistik, terroristik va aqidaparastlik g‘oyalari bilan yo‘g‘rilgan deb topilgan hamda O‘zbekiston hududiga olib kirish, tayyorlash, saqlash, tarqatish va namoyish etilishi taqiqlangan manba va kontentlarning yangi ro‘yxatini e’lon qildi.

Din ishlari bo‘yicha qo‘mitaning ma’lum qilishicha, 2025 yil 8 yanvardan 2026 yil 6 aprelga qadar jami taqiqlangan resurslar soni 244 taga oshib 1837 taga yetgan.

Tahlillarga ko‘ra, eng katta o‘sish Instagram’da – 121 ta bo‘lgan. Shuningdek, taqiqlangan manbalar Telegram’da 65 ta, YouTube’da 23 ta, Facebook’da 21 taga oshgan. TikTok, Odnoklassniki va veb-saytlarda ham kamroq o‘sish mavjud. Ilk bor Threads platformasida 1 ta taqiqlangan kontent aniqlangan.

«Bu holat radikal kontentning tarqalish tendensiyasi saqlanib qolayotgani, ayniqsa vizual va qisqa formatli platformalar (Instagram, TikTok) orqali tarqalishi davom etayotganini ko‘rsatadi», deyiladi Diniy qo‘mita bayonotida.

2026 yil 6 aprel holatiga taqiqlangan materiallar:

Telegram messenjerida 855 ta kanal va postlar;
Instagramʼda 386 ta profil va materiallar;
Facebookʼda 270 ta turli profil, sahifa va maqolalar;
Youtubeʼda 190 ta kanal va media mahsulotlar;
Tik-tokʼda 62 ta profil;
Odnoklassnikiʼda 39 ta profil;
Threadsʼda 1 ta manba;
14 ta turli sayt va dasturlar;
20 ta kitob va ma’ruzalar O‘zbekiston hududida taqiqlangan manbalar qatoriga kiritilgan.

Diniy idora fuqarolarni «aqidaparastlik, ekstremizm va terrorizm tuzog‘iga tushib qolishdan saqlanishga» chaqirdi.

Source link

Samarqandda maktabga chaqirilgan ota-onalar ishtirokida janjal kelib chiqib, ulardan biri o‘quvchilarga tahdid qilib, zo‘ravonlik qilgan. Bolalar ombudsmani holatni nazoratga olib, tekshiruv boshlanganini ma’lum qildi.

Ijtimoiy tarmoqlarda Samarqanddagi maktablardan birining sinfxonasida ayol bolani quvib, uni urmoqchi bo‘lgani aks etgan video tarqaldi. Tasvirlarda ayol o‘quvchilarga qarata: “Agar endi qaysi biring o‘g‘limga qo‘lingni uchini tekkizsang, qo‘lingni sindiraman. Oyog‘ingni tekkizsang oyog‘ingni sindiraman” degani eshitiladi.

Viloyat maktabgacha va maktab ta’limi boshqarmasi ma’lumotiga ko‘ra, hodisa 7 aprel kuni Qo‘shrabot tumanidagi 53-sonli umumta’lim maktabida, birinchi dars soatida sodir bo‘lgan.

Ta’kidlanishicha, 3 aprel kuni to‘rt nafar 1-sinf o‘quvchilari o‘zaro janjallashib qolgan. Shu munosabat bilan sinf rahbari ota-onalarni maktabga chaqirgan. Suhbat jarayonida o‘quvchilardan birining onasi boshqa o‘quvchiga nisbatan qo‘l ko‘targan va tahdid qilgan.

Bolalar ombudsmani ushbu holatni nazoratga olgani, uning so‘roviga asosan ichki ishlar organlari hamda ta’lim tizimi mutasaddilari voqeani o‘rganayotganini ma’lum qildi.

“Maktabdagi ta’lim jarayoniga tashqaridan hech bir shaxslarning kirib borishi, o‘quvchilar jismoniy va ruhiy sog‘lig‘iga zarar yetkazuvchi harakatlar qilishi qat’iyan taqiqlangan. Ta’lim muassasasida mas’ullar o‘quvchi bolalar uchun xavfli va bu kabi nomaqbul vaziyatlarga yo‘l qo‘yishi mumkin emas”, – deyiladi ombudsman munosabatida.

Hozirda holat yuzasidan Qo‘shrabot tumani IIB tomonidan tergovga qadar tekshiruv ishlari olib borilmoqda.

Source link

Surxondaryoda yashovchi ayol Xivaga sayohatga borgan. U Ichanqal’adagi haykallardan birini o‘pib, tasvirga olgan hamda ijtimoiy tarmoqdagi o‘z sahifasiga joylashtirgan.

JIB Xiva shahar sudi Ichanqal’adagi haykallardan birini o‘pgan ayolga ma’muriy jazo qo‘lladi. Kun.uz sud hujjati bilan tanishdi.

Sud qaroriga ko‘ra, Surxondaryo viloyatining Oltinsoy tumanida yashovchi 25 yoshli M.G. sayohat qilish uchun Xiva shahriga borgan. U 21 fevral kuni Ichanqal’adagi Xorazm milliy musiqa san’ati namoyandalariga bag‘ishlangan haykalni o‘pib, tasvirga olgan. So‘ngra uni ijtimoiy tarmoqdagi o‘z sahifasiga joylashtirgan.

M.G. sudda aybiga iqrorlik bildirgan. U qilmishidan pushaymonligini, homilador ekanini aytib, suddan yengillik so‘ragan.

Sud qarori bilan M.G. Ma’muriy javobgarlik to‘g‘risidagi kodeksning 64-1-moddasi 1-qismida nazarda tutilgan moddiy madaniy meros obektlariga nisbatan hurmatsizlik bilan munosabatda bo‘lish huquqbuzarligini sodir etgan deb topildi. Unga BHMning 5 baravari (2 mln 60 ming so‘m) miqdorida jarima jazosi tayinlandi.

Source link

Toshkent viloyatining Chirchiq shahrida tezkor tadbir davomida qalbaki hujjatlar orqali budjetdan 2 mlrd so‘m qo‘shilgan qiymat solig‘ini (QQS) noqonuniy qaytarishga urinish holati fosh etildi.

Davlat xavfsizlik xizmati va Iqtisodiy jinoyatlarga qarshi kurashish departamenti xodimlari tomonidan Navoiy, Toshkent va Andijon viloyatlari kesimida o‘tkazilgan tezkor tadbirda bir nechta shaxslar ishtirokidagi jinoiy sxemaga chek qo‘yildi.

Aniqlanishicha, Toshkent viloyatida faoliyat yurituvchi MChJning muqaddam sudlangan xodimi Navoiy viloyatidagi xususiy korxona ish boshqaruvchisining ishonchiga kirib, 2025–2026 yillarda go‘yoki 20 mlrd so‘mlik tovar aylanmasi amalga oshirilgani haqida qalbaki hujjatlar tayyorlash orqali 2 mlrd so‘m QQSni qaytarib berishni va’da qilgan. U ushbu “xizmat” uchun 340 mln so‘m talab qilgan.

Ma’lum bo‘lishicha, mazkur noqonuniy sxemada uning sherigi — Andijon shahrida yashovchi yakka tartibdagi tadbirkor asosiy rolni bajargan. U tanish MChJ va Navoiy viloyatidagi xususiy korxona o‘rtasida soxta elektron shartnoma tuzib, go‘yoki 18 mlrd 670 mln so‘mlik qurilish-montaj ishlari, transport xizmatlari va qurilish materiallari yetkazib berilgani haqida 10 ta qalbaki elektron hisob-faktura rasmiylashtirgan.

Natijada ushbu soxta hujjatlar asosida 2 mlrd so‘m QQS mablag‘ini qaytarishga erishilgan.

Shundan so‘ng talab qilingan 340 mln so‘m pul mablag‘ini olish jarayonida jinoiy guruhning yana ikki a’zosi — muqaddam bir necha marotaba sudlangan shaxslar ishtirok etgan vaqtda ularning noqonuniy harakatlariga chek qo‘yildi.

Tergovga ko‘ra, ushbu mablag‘ jinoiy guruh a’zolari o‘rtasida taqsimlanishi rejalashtirilgan.

Hozirda mazkur holat yuzasidan to‘rt nafar fuqaroga nisbatan Jinoyat kodeksining tegishli moddalari bilan jinoyat ishi qo‘zg‘atilgan. Shuningdek, ushbu sxemada ishtirok etgan bo‘lishi mumkin bo‘lgan soliq idoralari xodimlarini aniqlash bo‘yicha surishtiruv ishlari davom etmoqda.

Source link

Shaxsiy transport vositalariga texnik xizmat ko‘rsatish va ta’mirlash xizmatlari joriy yilning mart oyida 0,9 foiz (2025-yilning mos davriga nisbatan +7,0 foiz)ga, avtoturargohlar xizmati 0,7 foiz (2025-yil mart oyiga nisbatan +12,6 foiz)ga qimmatlashdi. Bu haqda Milliy statistika qo‘mitasi ma’lum qildi.

Qayd etilishicha, yo‘lovchi tashish transporti xizmatlari orasida milliy valyutaning yevro va Shveysariya frankiga nisbatan mustahkamlangani tufayli narxlar va tariflar pasayishi kuzatildi.

Xususan, kuzatilgan yo‘nalishlar bo‘yicha aviaparvozlar narxi o‘rtacha 4,1 foizga, uzoq masofaga  qatnovchi poyezdlar chiptalari esa 0,5 foizga arzonlashgani qayd etildi. Xalqaro avtobuslarda va shunga o‘xshash tashuvlarda yo‘lkira haqi 1,4 foizga, taksi xizmatlari 0,4 foizga, yuk tashish xizmatlari esa o‘rtacha 0,4 foizga oshgani qayd etildi.

Shuningdek, oy davomida benzin uchun o‘rtacha iste’mol narxlari darajasi 0,9 foiz (2025-yil mart oyiga nisbatan +9,2 foiz)ga pasaydi. Bunda, benzinning AI-92 markasi — 0,9 foizga, AI-95 markasi — 1,3 foizga, AI-98 va AI-100 markalari esa — 0,5 foizga arzonlashdi.

Propanning narxi oy davomida 3,2 foiz (2025-yil martiga nisbatan +9,6 foiz)ga arzonlashib, 1 litr uchun yuqori narx chegarasi 8 400 so‘mni tashkil etdi. 2026-yil mart oyida metan narxi fevral oyi darajasida kuzatildi, biroq 2025-yil martiga nisbatan 30,3 foizga yuqori darajada saqlanib qoldi.

Source link