Siyosat
“Yevropa Ittifoqi har qadamda Ukraina bilan hamnafas”
Yevropa Ittifoqi Ukrainaning suvereniteti, mustaqilligi va hududiy yaxlitligini qo‘llab-quvvatlashga sodiqdir. Bu haqda YeIning O‘zbekistondagi elchisi Toyvo Klaar Toshkentda Rossiyaning Ukrainaga tajovuzi boshlanganining to‘rt yilligi munosabati bilan tashkil etilgan ko‘rgazma ochilishida ma’lum qildi.
“Yevropa Ittifoqi Ukrainaga siyosiy, iqtisodiy, harbiy va diplomatik jihatdan eng yirik ko‘mak beruvchi tomon bo‘lib qolmoqda hamda adolatli va barqaror tinchlikka olib boruvchi har qanday ishonchli yo‘lni qo‘llab-quvvatlashga sodiqdir. Biz har qadamda siz bilanmiz va YeI timsolida siz doimo ishonchli va barqaror hamkorni topasiz”, – dedi elchi Toyvo Klaar.
YeI delegatsiyasi Ukraina elchixonasi bilan birgalikda “Ilhom” teatrida tashkil etgan ko‘rgazmada Ukraina madaniy ramzlari, ijtimoiy hodisalar, tarixiy voqealar va an’analarga oid turli nuqtai nazarlarni aks ettiruvchi asarlar jamlanmasi taqdim etilmoqda.
Ukrainalik illyustratorlar ijodiga mansub asarlarda zamonaviy vizual san’at orqali Ukrainaning go‘zalligi va boyligini ko‘rsatish, mamlakatning milliy o‘ziga xosligi va madaniy merosini keng jamoatchilikka taqdim etish ko‘zda tutilgan.
Foto: YeI delegatsiyasi
Ko‘rgazma joriy yil 25-28 fevral kunlari “Ilhom” teatrida davom etadi.
Dastur doirasida ukrainalik teleboshlovchi Anton Ptushkinning “Biz, uy hayvonlarimiz va urush” nomli hujjatli film ham namoyish etildi. Kartina urushda jabr ko‘rgan hayvonlarni qutqarish uchun hayotini xavf ostiga qo‘yayotgan askarlar va ko‘ngillilar – ukrainaliklar hamda xorijliklar haqida hikoya qiladi. Bu shunchaki urush tasviri emas, balki insonparvarlik, mehr-shafqat va inson bilan hayvon o‘rtasidagi favqulodda bog‘liqlik haqidagi hikoyadir.
24 fevral kuni O‘zbekistonda akkreditatsiya qilingan YeIga a’zo davlatlar elchilari boshqa yevropalik hamkorlar bilan birgalikda qo‘shma videomurojaat yo‘llab, Rossiya agressiyasi natijasida halok bo‘lgan yuzlab bolalar xotirasini yod etdilar.
YeI kengashi
Urushning to‘rt yilligi munosabati bilan Bryusseldagi YeI kengashi binosida birdamlik ramzi sifatida Ukraina bayrog‘i ranglari aks etdi.
Yevropa komissiyasi prezidenti Ursula fon der Lyayen 24 fevral kuni Kiyevga tashrif buyurdi va Bryussel Ukrainani qo‘llab-quvvatlashda davom etishini ta’kidladi.
Ma’lumotlarga qaraganda, YeI urush boshlangan 4 yil mobaynida Ukrainaga 200 milliard yevrodan ziyod ko‘mak ko‘rsatgan.
2022 yil 24 fevral kuni Rossiya keng ko‘lamli urush boshlagan holda Ukraina hududiga bostirib kirgan edi.
BMTning Inson huquqlari bo‘yicha monitoring missiyasi ma’lumotlariga ko‘ra, o‘tgan to‘rt yil ichida kamida 15172 nafar tinch aholi vakili, jumladan, 763 nafar bola halok bo‘ldi. Bu faqat tasdiqlangan holatlar bo‘lib, real son bundan ancha yuqori bo‘lishi mumkin.
Urush Ukraina xalqi boshiga yana ko‘plab musibatlarni yog‘dirdi.
Avval xabar berganimizdek, Rossiya agressiyasining to‘rt yilligi munosabati bilan maxsus bayonot bergan Ukraina prezidenti Vladimir Zelenskiy mamlakatni panohgohlarga kirishga majbur qilish mumkinligi, ammo ukrainaliklar aslo bosqinchiga bo‘ysunmasligini ta’kidladi.
Bugun, 25-sentyabr kuni O‘zbekiston Prezidenti Shavkat Mirziyoyev Xitoy Xalqaro madaniy kommunikatsiya markazi raisi Long Yuysyan va Gonkongning «JDB Group» kompaniyasi asoschisi Chan Xuntoni qabul qildi. Bu haqda Prezident matbuot xizmati xabar berdi.
Qayd etilishicha, O‘zbekiston bilan Xitoy o‘rtasidagi barcha sharoitlarda har tomonlama strategik sheriklik munosabatlarini yanada chuqurlashtirish va madaniy-gumanitar aloqalarni mustahkamlash masalalari ko‘rib chiqildi.
Markaz O‘zbekistonning Xitoy bilan ko‘p qirrali hamkorligini mustahkamlashga katta hissa qo‘shib kelayotgani qayd etildi. Birgalikda infratuzilmani rivojlantirish, investitsiyalar va «yashil» sanoat sohalarida qator loyihalar amalga oshirildi.
«JDB Group» kompaniyasining O‘zbekistondagi faoliyatining ustuvor yo‘nalishlari sifatida zamonaviy shahar, transport va sanoat infratuzilmasini rivojlantirish hamda geologiya sohasi belgilandi.
Uchrashuv yakunida mazkur kompaniya ishtirokida amalga oshirilayotgan va yangi loyihalarni jadallashtirish yuzasidan kelishuvga erishildi.
Siyosat
Saida Mirziyoyeva Diyene Keyta bilan demografik barqarorlik va inson kapitali bo‘yicha hamkorlikni muhokama qildi
O‘zbekiston Respublikasi Prezidenti Administratsiyasi rahbari Saida Mirziyoyeva BMT Bosh kotibi o‘rinbosari, BMT Aholishunoslik jamg‘armasi (UNFPA) ijrochi direktori Diyene Keyta bilan uchrashdi.
Muloqotda demografik barqarorlik, inson kapitali va aholi farovonligini ta’minlash bo‘yicha hamkorlikni yanada rivojlantirish masalalari muhokama qilindi.
Saida Mirziyoyeva O‘zbekistonning asosiy kapitali yosh avlod ekanini ta’kidladi. U demografik salohiyatni kelgusida dividend manbaiga aylantirish uchun inson, ayniqsa, ayollar va bolalarning salomatligi, ta’limi hamda xavfsizligiga investitsiya kiritish zarurligini bildirdi.
Saida Mirziyoyeva o‘zining Telegram kanalida demografik prognozlash tizimini yo‘lga qo‘yilayotganini ma’lum qildi. Shuningdek, «Demografik dividend — 2050» strategiyasini ishlab chiqish rejalashtirilayotganini aytdi.
Tomonlar demografik barqarorlikni faqat aholi soni bilan bog‘liq masala sifatida emas, balki ta’lim, sog‘liqni saqlash, bandlik, ijtimoiy himoya va oilalarni qo‘llab-quvvatlashni qamrab oladigan uzoq muddatli taraqqiyot masalasi sifatida ko‘rish zarurligini ta’kidladi.
Shuningdek, demografik ma’lumotlar va tahliliy prognozlar asosida qarorlar qabul qilish hamda inson kapitali va ijtimoiy xizmatlarga investitsiyalarni kuchaytirish bo‘yicha xalqaro hamkorlikni rivojlantirish masalalari muhokama qilindi.
Muloqotda aholining farovonligini oshirish va demografik jarayonlarni samarali boshqarishda ma’lumotlar hamda prognozlarning ahamiyatiga e’tibor qaratildi.
Prezident administratsiyasi rahbari Saida Mirziyoyeva Nyu-Yorkda «BlackRock» rahbariyati bilan uchrashdi.
Unda kompaniya prezidenti Robert Kapito, vitse-rais Tomas Donilon, «Global Infrastructure Partners» raisi va bosh ijrochi direktori Adebayo Ogunlesi, Moliyaviy va strategik investorlar guruhi global rahbari hamda kompaniyaning Yaqin Sharq mintaqasi bo‘yicha rahbari Charlz Hatami qatnashdi.
Muloqot davomida 2027-yilda Toshkent xalqaro moliya markazi faoliyatini yo‘lga qo‘yish masalasini muhokama qilindi. «BlackRock» ushbu Markaz konsepsiyasi va tuzilmasini ishlab chiqishda ko‘maklashmoqda.
AQSh ishbilarmon doiralari vakillari ishtirokidagi qo‘shma davra suhbatida O‘zbekiston hamda mintaqamizning yaqin o‘n yilliklarga mo‘ljallangan rivojlanish istiqbollari yuzasidan fikr almashildi.
O‘zbekiston yirik, samarali, sifatli sarmoyalar uchun yangi imkoniyatlar maydoniga aylanmoqda, dedi Saida Mirziyoyeva.
Mudofaa vaziriga ikki o‘rinbosar tayinlandi. Bu haqda vazirlik matbuot xizmati xabar berdi.
Jumladan, Prezidentning tegishli qaroriga muvofiq, polkovnik Zoidov Qahramonjon Obidjonovich O‘zbekiston mudofaa vazirining qurollanish va qurollantirish bo‘yicha o‘rinbosari lavozimiga tayinlandi.
Adliya polkovnigi Muratov Jahongir Dilshatovich vazirning komplayens va korrupsiyaga qarshi ichki nazorat bo‘yicha o‘rinbosari lavozimiga tayinlandi.
Prezident Shavkat Mirziyoyev Andijon viloyatiga tashrif buyuradi.
Ikki kunlik safar dasturidan hududning sanoat va investitsiya salohiyati, energetika, qishloq xo‘jaligi, transport, turizm va boshqa sohalardagi loyihalar bilan tanishish o‘rin olgan. Davlatimiz rahbari mahallalardagi bunyodkorlik ishlarini ham ko‘zdan kechiradi. Qator yangi quvvatlarni ishga tushirish va istiqbolli loyihalar qurilishini boshlash ko‘zda tutilgan.
Shuningdek, Andijon viloyatini yanada rivojlantirishning ustuvor yo‘nalishlari muhokamasiga bag‘ishlangan yig‘ilish bo‘lib o‘tadi.
