25 fevral kuni Toshkent shahrining Mirobod tumanida voyaga yetmagan Doniyor Turg‘unov avtomashinada yo‘l-patrul xizmati inspektori Hosilbek Eshnazarovni urib yuborgan, keyinchalik u og‘ir jarohatlar oqibatida vafot etgan edi. Mukofotlash to‘g‘risidagi prezident farmonida inspektorning «qasamyodiga sodiq qolgan holda o‘z burchini sidqidildan va yuksak sharaf bilan ado etib, mardlik va fidoyilik namunasini ko‘rsatgani» qayd etilgan.

Foto: Ichki ishlar vazirligi

Prezident farmoniga ko‘ra, marhum kichik serjant Eshnazarov Hosilbek Beknazar o‘g‘li «Jasorat» medali bilan mukofotlandi.

«Ichki ishlar organlaridagi fidokorona mehnati, yurtimizda jinoyatchilikka qarshi kurashish, jamoat xavfsizligi va xalqimiz osoyishtaligini saqlash, yo‘llarda harakat xavfsizligini ta’minlash, yo‘l-transport hodisalarining oldini olish, qoidabuzarliklar profilaktikasini samarali amalga oshirish borasidagi katta xizmatlari, muqaddas qasamyodiga sodiq qolgan holda o‘z burchini sidqidildan va yuksak sharaf bilan ado etib, mardlik va fidoyilik namunasini ko‘rsatgani, yosh avlodni Vatanga muhabbat va sadoqat ruhida tarbiyalashdagi faol ishtiroki uchun Toshkent shahar Ichki ishlar bosh boshqarmasining yo‘l harakati xavfsizligi boshqarmasi yo‘l-patrul xizmati inspektori, marhum kichik serjant Eshnazarov Hosilbek Beknazar o‘g‘li «Jasorat» medali bilan mukofotlansin», deyiladi farmonda.

2026 yil 25 fevral kuni Toshkent shahrining Mirobod tumanida voyaga yetmagan Doniyor Turg‘unov avtomashinada yo‘l-patrul xizmati inspektori Hosilbek Eshnazarovni urib yuborgan edi. Keyinchalik inspektor og‘ir jarohatlar oqibatida vafot etdi. Bosh prokuratura xabariga ko‘ra, jinoyat ishi doirasida Doniyor Turg‘unov qamoqqa olingan. U Jinoyat kodeksining 267-moddasi 1-qismi (Transport vositasini olib qochish, 5 yildan 10 yilgacha ozodlikdan mahrum qilish jazosini nazarda tutadi) va 104-moddasi 3-qismi (Qasddan badanga og‘ir shikast yetkazish, 8 yildan 10 yilgacha ozodlikdan mahrum qilish jazosini nazarda tutadi) “d” bandida nazarda tutilgan jinoyatlarni sodir etganlikda gumon qilinmoqda.

Source link

Ijtimoiy tarmoqlarda “tirik kitob” sifatida tanilgan kitob sotuvchisi Xayrulla Asadov noqonuniy tadbirkorlik faoliyati bilan shug‘ullangani uchun jarimaga tortildi. U 20 ming so‘mga xarid cheki bermagan va kunlik savdodan tushgan 20 ming so‘m pulni onlayn nazorat kassa mashinasi xotirasiga kiritmagan. Toshkent shahar sudlari ma’naviyat va savdo o‘rtasida farq borligini, kitob ma’naviyat vositasi bo‘lishi barobarida sotuvda u tovar hisoblanishini bildirdi.

Ko‘chada kitob sotish faoliyati bilan shug‘ullanadigan, ko‘pchilik ijtimoiy tarmoqlar orqali “tirik kitob” sifatida taniydigan Xayrulla Asadov ma’muriy jazoga tortildi. Bunga uning tadbirkorlik faoliyati bilan noqonuniy shug‘ullangani sabab bo‘lgan.

Kun.uz tanishgan sud qarorida keltirilishicha, 2025 yil 23 sentabr kuni Mirzo Ulug‘bek tumani davlat soliq inspeksiyasi xodimlari Xayrulla Asadovga tegishli ko‘chma savdo nuqtasida tekshiruv o‘tkazgan. Jarayonda u xaridorga 20 ming so‘mga xarid cheki bermagani va kunlik savdodan tushgan 20 ming so‘m pulni onlayn nazorat kassa mashinasi xotirasiga kiritmagani, shuningdek, tegishli hujjatlarsiz faoliyat yuritayotgani aniqlangan.

Xayrulla Asadov qilmishidan pushaymon ekanini, bu kabi harakatlarni boshqa sodir etmasligini aytib, suddan yengillik so‘ragan.

JIB Mirzo Ulug‘bek tuman sudining 2026 yil 6 yanvardagi qarori bilan Xayrulla Asadov Ma’muriy javobgarlik to‘g‘risidagi kodeksning 176-moddasi 1-qismida nazarda tutilgan tadbirkorlik faoliyatini davlat ro‘yxatidan o‘tmasdan amalga oshirish huquqbuzarligini sodir qilgan deb topilgan. Unga BHMning 5 baravari (2 mln 60 ming so‘m) miqdorida jarima jazosi qo‘llangan.

Shuningdek, Xayrulla Asadovning narxi 1 mln 520 ming so‘m bo‘lgan 3 turdagi 100 dona kitobi tegishli tartibda musodara qilingan.

Toshkent shahar sudlari holat yuzasidan munosabat bildirdi.

“Ma’naviyat va savdo o‘rtasida farq bor. Kitob – ma’naviyat vositasi ekani to‘g‘ri, biroq u sotuvda tovar hisoblanadi, sotuvchi esa savdo qoidalariga rioya etishi kerak. Bu masalaning huquqiy tomoni. Masalaning ijtimoiy-ma’naviy tomonlari ham bor, albatta. Bu, ish holatidan kelib chiqib, yuqori sud instansiyasida muhokama qilinishi mumkin”, deyiladi munosabatda.

Qo‘shimcha qilinishicha, qonun sud qaroridan norozi tarafga shikoyat qilish imkoniyatini beradi. Buning uchun yuqori sud instansiyasiga murojaat etish lozim.

Source link

Tezkor vakillardan biri yonidan narkotik modda topilgan fuqaroni jinoiy javobgarlikka tortmaslik evaziga undan 2 200 dollar talab qilgan. Shundan ming dollarini muqaddam olib, qolganini o‘z xizmat xonasida olgan vaqtida ushlangan. Uning sherigi ham qo‘lga olingan.

Foto: Davlat xavfsizlik xizmati

Toshkentda IIBning ikki tezkor vakiliga nisbatan jinoyat ishi qo‘zg‘atildi. Bu haqda Davlat xavfsizlik xizmati xabar berdi.

Ma’lum qilinishicha, Olmazor tumanida yashovchi 44 yoshli fuqaroning yonidan 3 gr gashish narkotik moddasi topilgan va holat yuzasidan tergovga qadar tekshiruv harakatiga kirishilgan. Shayxontohur tumani IIO FMB Jinoyat qidiruv bo‘limi katta tezkor vakili Toshkent shahar IIBB Jinoyat qidiruv boshqarmasi katta tezkor vakili bilan kelishgan holda ushbu fuqarodan uni jinoiy javobgarlikka tortmaslik evaziga 2 200 dollar talab qilgan. U kelishilgan puldan muqaddam ming dollar olgan.

Tezkor vakil qolgan 1 200 dollarini o‘z xizmat xonasida olgan vaqtida Davlat xavfsizlik xizmatining Toshkent shahar bo‘yicha boshqarmasi xodimlari tomonidan qo‘lga olingan. Shuningdek, Toshkent shahar IIBB JQB katta tezkor vakili ham protsessual tartibda ushlangan.

Toshkent shahar prokuraturasi tomonidan mazkur katta tezkor vakillarga nisbatan Jinoyat kodeksining 210-moddasi (pora olish) 2-qismi tegishli bandlari bilan jinoyat ishi qo‘zg‘atilgan. Ularga qamoqqa olish tarzidagi ehtiyot chorasi qo‘llangan. Hozirda tergov harakatlari olib borilmoqda.

Avvalroq elektr energiyasidan noqonuniy foydalanish holati bo‘yicha qo‘llangan 276 mln so‘mlik jarimani “tanishlari orqali hal qilib berish” va chora ko‘rilmasligini ta’minlash evaziga 9 ming dollar talab qilgan prokuratura xodimi qo‘lga olingandi.

Source link

Surxondaryolik bir guruh nogironlar najot izlab Toshkentga kelishdi. Ularga bir paytlar davlatdan sovg‘a deb berilgan xonadonlar aslida kredit bo‘lgan. Ijtimoiy himoyaga muhtoj bu insonlar kreditni qanday to‘laydi?

Kun.uz bu masalani avvalroq bir guruh boshqa qumqo‘rg‘onliklar misolida yoritgan edi. O‘shanda, 2025 yil dekabrida Unicon-Soft kompaniyasi homiy sifatida 8 kishining kreditini yopib bergan edi.

Kuni kecha murojaat bilan kelgan vatandoshlarga quloq tutamiz.

“Oilada uch nogironmiz, kreditni qanday to‘laymiz?”

Zuhra Eshmamatova: Biz Surxondaryo viloyati Qumqo‘rg‘on tumanidan kelganmiz. Xo‘jayinim birinchi guruh nogironi, uning pensiyasini olib qo‘yishyapti. Buning ortidan “davleniya” orttirib olgan. Uchta voyaga yetmagan farzandimiz bor, biri nogiron. Oilada uchta nogironmiz. Bolamning ukol-dorisini qilaymi, kommunal to‘lovlarini to‘laymi, qanday kun ko‘ramiz? Uydan chiqarib yuborsa, uchta nogiron qayerga sig‘amiz? Yordam berishlarini so‘raymiz. Ukol-dorimizdan orttira olmayapmiz.

Oyiga 1,87 million so‘m to‘lov chiqib kelgan. 14 million 800 ming mebelga ham chiqib kelgan. To‘lolmaganimiz uchun mebelimizni olib ketib qoldi. Ikkita gilamga ham mana, chiqib o‘tiribdi, gilamga ham sudga oshib ketgan. 4 million 800 mingni to‘laysan deb o‘tiribdi. Uyga to‘laylikmi, gilamga to‘laylikmi?

“Plastikdagi pullarni bir so‘m qoldirmay yechib olyapti”

Nurbek Rahmonov: Biz Surxondaryo viloyati Qumqo‘rg‘on tumanidan kelganmiz, Bog‘ora mahallasidan. Bizga ham shu 2018 yil sovg‘a deb uy berildi. Keyin “to‘la” deyishdi. O‘zim ko‘z bo‘yicha birinchi gruppaman, ayolim ikkinchi gruppada. Voyaga yetmagan ikkita farzandimiz bor. Pensiyalarimizni ham kesib ketyapti. Plastikdagi pullarni ham kesib ketyapti, bir so‘m qoldirmay.

“Sovg‘a deb berishgan edi”

Ra’no Ablametova: Surxondaryo viloyati Qumqo‘rg‘on tumani Bog‘ora mahallasidan keldik. Bizga 2018 yil namunali uylardan sovg‘a sifatida berilgan edi. Xo‘jayinim ikkinchi guruh nogironi, qizim birinchi guruh nogironi, men ularga qarovchiman. Uch oy-besh oydan beri kredit chiqarib qo‘ydi, uni to‘lay olmayapmiz.

Bizga sovg‘a deb berilgan edi. Bir oyga 2 million 700 chiqarib qo‘yibdi. Uni qanday to‘laymiz? Biz o‘zi 1 million pensiya olsak, 500 mingini olib qoladi. Dori-darmonimizga bo‘lsinmi, produktamiz, kommunal to‘lovimizga bo‘lsinmi?

“Uyni tortib olsa, boradigan joyim yo‘q”

Gulnigor Nishonova:

— 2018 yilda nogiron turmush o‘rtog‘im Mirboboyev Ibrohimga uy berilgan edi. U 2019 yilda vafot etdi. Men uchta voyaga yetmagan farzandim bilan shu uyda qoldim, shu uyda yashab kelyapmiz. Uy uchun 2023 yilgacha to‘lov qilib kelindi, endi esa yo‘q (hokimliklar tomonidan tadbirkorlar homiy sifatida biriktirib kelingan – tahr.). 1 million 260 ming so‘m nafaqa olaman. Kechadan beri Toshkentdamiz, sarson bo‘lib yuribmiz. Vazirliklarga bordik, ular arizamizni qabul qilmadi. Uyni tortib olsa, boradigan joyim yo‘q.

“Ko‘p joylarga murojaat qildik…”

Hosiyat Normurodova:

Ikkinchi guruh nogironiman. Menga ham 2018 yilda sovg‘a tariqasida uy berilgan edi. Hamma qatori men ham shu joyga kirgan edim. Hozir qarzim 56 million bo‘lib ketgan. 178 millionlik uy berishgan. Ko‘p joylarga murojaat qildik. Viloyat hokimiga ham kirdik, u yordam qilaman deyapti, lekin homiy tashkilotlar to‘lab berolmayapti.

“Pensiya yetmayapti…”

Xushmuhammad Xo‘jaqulov:

Men Surxondaryo viloyati Qumqo‘rg‘on tumanidagi Bog‘ora mahallasidan keldim. Uyning kreditini to‘lolmayapmiz. Yordam bersangiz. Kelishimizning sababi shu. Buyog‘i, pensiyadan ham olinadi. Xullas, pul yetkazolmayapmiz. Pensiya ham yetmayapti. Shunga bizga ijobiy yordam beringizlar. Bir homiy biriktirdi, uch yilcha homiy to‘ladi, keyin yo‘q bo‘lib ketdi. 100 million pul – qarz.

Source link

Surxondaryoning turizm salohiyatini ishga solib, yiliga 1 milliard dollarlik tushum qilsa bo‘ladi. Bu haqda davlat rahbari viloyatni kompleks rivojlantirishga bag‘ishlangan yig‘ilishda qayd etib o‘tdi.

Viloyatda Al-Hakim at-Termiziy, Sulton Saodat, Kokildor ota, Qirq qiz singari 150 dan ziyod madaniy meros obekti joylashgan. Hisor, Boysuntog‘, Ko‘hitang, Bobotog‘da alpinizm, trekking, ekoturizm uchun juda katta imkoniyat bor.

Yigirma olti asrlik tarixga ega Eski Termiz yodgorligi to‘liq o‘rganilmagan. Buddizm madaniyatiga oid Fayoztepa, Qoratepa, Dalvarzin, Zurmala kabi yodgorliklarning turizm salohiyatidan foydalanib, Yaponiya, Koreya, Xitoy, Tailanddan yiliga 500 ming sayyoh jalb qilish mumkin.

Mutasaddilarga Yaponiya turagentlari bilan turizm marshruti ishlab chiqib, muzey, o‘zbek-yapon oshxonasi va Yapon bog‘i tashkil qilish bo‘yicha loyihalarni boshlash topshirildi.

Polvonlar yurti Surxondaryoda 8 mingdan ortiq yoshlar kurash bilan doimiy ravishda shug‘ullanadi. Joriy yilda Denovdagi «Zamondosh» oromgohi negizida kurashchilar uchun zamonaviy o‘quv-mashg‘ulot bazasini qurib berish topshirildi.

Boysundagi maktab-internatda kurash bilan shug‘ullanayotgan yoshlar uchun shu yerning o‘zida ta’lim olish imkoniyatini yaratish kerakligi qayd etildi. Yangi o‘quv yilidan ushbu maktab-internatda sport bilan birga maktab darslari ham yo‘lga qo‘yiladi.

Source link