Jamiyat
3 oyda 1,6 mln o‘zbekistonlik xorijga safar qildi
2026-yil yanvar–mart oylarida 1 million 631 ming nafardan ortiq O‘zbekiston fuqarolari turizm maqsadida xorijga safar qildi. Milliy statistika qo‘mitasiga ko‘ra, bu ko‘rsatkich 2025-yilning mos davriga nisbatan 111,6 ming nafarga oshgan.
Ma’lum bo‘lishicha, asosiy safarlar qo‘shni davlatlar hissasiga to‘g‘ri kelmoqda. Jumladan, 2026 yilning dastlabki uch oyida eng ko‘p safar qilingan davlat Qirg‘iziston bo‘lib, 660 579 nafar fuqaro ushbu mamlakatga borgan.
Keyingi o‘rinlarda Qozog‘iston (284 024 nafar) va Tojikiston (282 040 nafar) qayd etilgan. Shuningdek, Saudiya Arabistoni 136 060 nafar bilan yuqori o‘rinni egallagan. Rossiya, Turkiya, BAA, Xitoy, Tailand va Misr ham eng ko‘p tanlangan yo‘nalishlar qatoriga kirgan.
Ma’lumot o‘rnida, 2026-yilning yanvar-mart oylarida 164 ta mamlakatdan jami 2 872 502 nafar chet el fuqarolari turistik maqsadlarda O‘zbekistonga tashrif buyurgan.